Áleýmettik jelide paıda bolǵan Roza Baǵlanovanyń shyndyqty qoryqpaı, taısalmaı aıtqan vıdeosy qaıta tarala bastady. Vıdeo eski bolǵanymen, ánshi kótergen másele áli kúnge deıin ózekti. Roza Baǵlanova búginde ómirde bolmaǵanymen sózi ólgen joq. Qazaqstan jáne SSRO halyq artısi zıaly qaýym jınalǵan zalda minberde sóılep tur, jaı sóılep turǵan joq, qazaqtyń qasiretin aıtyp tur. Al zalda múlgigen tynyshtyq...

«Men soǵysty kórdim. Biraq Araldaǵy jaǵdaıdy sózben toqtata salý múmkin emes. Soǵysty toqtatýǵa bolady, atom bombasyn da, ushaqty da toqtatýǵa bolady. Biraq muny toqtata almaımyz. Biz munda sóılep turǵanda ana jerde tabıǵat óz degenin istep jatyr. Bizdiń «uly» ǵalymdarymyz bútin bir urpaqty ólimge, aýrý-keselge qıyp otyr, men olarǵa ne deımin? Olar SSRO-nyń akademıkteri, Sovet odaǵynyń úsh dúrkin batyrlary. Ne deýge bolady? Bútin bir ult joıylyp bara jatyr!

Semeıde polıgon. Baıqońyrda kosmodrom, Aralda ý. Men barlyq jerde boldym, qoly joq, kózi joq, aıaǵy joq múgedek balalardy kórdim.  Bul tragedıany biz kimge aıtýymyz kerek? Ulttyń basyna túsken tragedıasyn jetkizý úshin kimge aıtýymyz kerek, kimnen kómek suraýymyz kerek?» - degen Roza hanym kózine jas aldy.