Ótkende Májilis depýtaty Aıqyn Qońyrov bastaǵan QKHP fraksıasynyń depýtattary Premer-mınıstr Baqytjan Saǵyntaevtyń jáne Ulttyq banktiń tóraǵasy Danıar Aqyshevtyń atyna depýtattyq saýal joldap, teńge kýrsynyń tómendeýine sáıkes halyqtyń zeınetaqy qoryndaǵy (BJZQ) salymy men bankterdegi teńgemen salynǵan depozıtterin ındeksasıalaý kerektigi týraly aıtyp depýtattyq saýal joldaǵanyn jazǵanbyz.
Soǵan jýyrda Úkimetten de, Ulttyq bankten de jaýap keldi. Kelgeni ne kerek, ekeýi de aýyzdaryn qý shóppen súrtip, jarytpady. Depýtat ındeksasıalaý kózderin de kórsetip bergenin eske sala keteıik. «Qazir munaı baǵasy 80 dollarǵa jaqyndady. Al teńgeniń 1 dollarǵa shaqqandaǵy kýrsy 380-ge jaqyndady desek, osynyń nátıjesinde árbir barel munaı kompanıalaryna 30 400 teńge taza tabys ákeledi. Sóıtip, artyq shyǵynsyz, tek teńge kýrsynyń ózgerýimen ǵana munaı kompanıalary jalpy el boıynsha trıllıon teńgege jýyq qosymsha taza paıda kórip otyr. Osynyń ózi halyqtyń zeınetaqy qory men depozıttegi salymdaryn ındeksasıalaýǵa erkin jeter edi,»- degen bolatyn depýtat.
Úkimettiń jaýabynda bul máseleni aýyzǵa alýdyń ózinen qoryqqan sıaqty. Óıtkeni jaýabynda munaı salasynan túsetin tabystyń bári Ulttyq qorǵa baǵyttalatynyn, al onyń aqshasyna úkimet qaısybir qaýlylarǵa sáıkes tıise almaıtynyn jazypty. Jalǵyz-aq «bas dese qulaq» degendeı bolyp jurttyń bári biletin - BJZQ-nyń ózi jobalarǵa ınvestısıa quıý arqyly tabys tabatynyn kórsetipti... Al depozıttik salymdarǵa baılanysty aıtqanda, halyqtyń ózi olardyń saqtalýy úshin áreket etýi kerek degenge toqtapty. Sóıtip, Ulttyq qorǵa baǵyttalǵan ústeme tabystyń ózin halyqqa berýge shamasy joq ekenin bildirgen.
Al Ulttyq bank tóraǵasy D.Aqyshev jaýabyn «Qazaqstan Respýblıkasy azamattaryna jınaqtaýshy zeınetaqy júıesindegi jınaqtarynyń ınflásıa nátıjesinde qunsyzdanýdan saqtalýyna kepildik beredi» dep bastapty. Sóıtse, ol kepildik bylaı eken. Bir adam zeınetke shyqsa, onyń salymy sol ýaqyttaǵy ınflásıa deńgeıine sáıkes kóbeıtiledi eken. Al ol adamnyń salymy ózi zeınetke shyqqanǵa deıingi 5-6 nemese odan kóp jyldarda tıynǵa aınalyp ketetinine Ulttyq bank bas aýyrtpaıtyn sıaqty...
Al depozıtterge qatysty jaýapta bylaı jazylǵan: «Qazaqstan azamattarynyń jınaq aqshalaryn qandaı valútada saqtaýyna qatysty tańdaý quqyǵy bar. Azamattar ekinshi deńgeıdegi bankterde ulttyq valútada da, shet memleketterdiń valútasynda da depozıtter asha alady, bul jınaq aqshany ózdiginen ártaraptandyrýǵa múmkindik beredi». Sóıtip, jaýapta óz aqshalaryńdy saqtaǵylaryń kelse, sheteldik valútamen jınaqtaýǵa múmkindigiń bar degendi aıtady tóraǵa.
Mine, halyqqa jany ashıtyn úkimetimiz ben ulttyq bankimizdiń jaýaby osyndaı bolypty.
S.Eleý, sarapshy
