Búgin Qazaqstan Respýblıkasy Mádenıet jáne sport mınıstrligi Til saıasaty komıteti Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń uıymdastyrýymen «Jalpyhalyqtyq dıktant» ótkizildi, dep habarlaıdy Qamshy.kz aqparat agenttigi. 

30 mınýtqa sozylǵan dıktantqa Almaty qalasy boıynsha 120-ǵa jýyq azamat qatysty. 15 jastan asqan kez kelgen almatylyq óz erkimen dıktantqa keldi.

Sharanyń maqsaty – jańa qazaq álipbıin nasıhattaý, latynnegizdi qazaq álipbıin praktıkalyq turǵyda meńgerýge daǵdylandyrý. Sonymen qatar respýblıka halqynyń jańa latyn álipbıine degen kózqarasy men tanymyn tereńdetý. Sol arqyly aldaǵy ýaqytqa josparlanǵan latyn álipbıine birtindep kóshý josparyna negiz qalaý úshin halyqty jumyldyrý.

Dıktant Almatynyń joǵarǵy oqý oryndarynda ótkizildi. Qatysýshylar aldymen mátinniń aýdıojazbasyn tyńdady. Tyńdap bolǵan soń aýdıojazba arqyly dıktantty jazdy. Taqyryby – latyn álipbıi jaıynda. 

Dıktant aıaqtalǵan soń mátinniń durys nusqasy led ekranda kórsetildi. Ár azamat ekranǵa qarap otyryp, óz mátinin teksere alady. Dıktant 3,4,5 shkalasy arqyly baǵalanady.

Azamattarǵa búgingi dıktant qıynǵa soqpaǵan syńaıly. Sharaǵa qatysqan 2-kýrs stýdenti Januzaqov Berik dıktanttan "5" degen baǵa alǵan. Aıtýynsha, dıktantty múldem qatesiz jazǵan. 

«Kırıll álipbıine úırenip qalǵandyqtan alǵashynda qıyn bolary anyq. Alaıda bul ózgeriske beıimdelip ketemiz dep oılaımyn», - dedi Berik Qamshy.kz aqparat agenttiginiń tilshisine.