Shetelde shákirtterine seksýaldyq zábir kórsetkeni úshin jumystan qýylǵan ustaz Astanadaǵy elıtaly mektepterdiń birinde sabaq berip kelgen. Qaýipti pedagogty elordalyq bilim ordasynyń jumysqa qalaı qabyldaǵany belgisiz. Tek jaqynda stýdentterdi saıahatqa alyp barǵan sheteldik muǵalimniń quıturqy áreketi áshkere boldy. Bul týraly Eýrazıa birinshi arnasy habarlaıdy.
Astanadaǵy halyqaralyq mektepte sabaq berip kelgen aty shýly ustazdyń eki túrli esimi bar eken. Stıven Djeksonnyń aty-jóni buryn Stıven Meıers bolǵan. Demek, Qazaqstanǵa keler aldynda qujatyn aýystyryp alǵanǵa uqsaıdy.
Mundaı aqparat ınternette bar. Odan seksýaldyq zábir kórgen sheteldik stýdentter men muǵalimder arnaıy saıt ashyp, qaýipti pedagogtyń qaıda jumys istegenin, kim ekenin barlyǵyn jarıalaǵan. Buǵan deıin Anglıa, Amerıkanyń birneshe shtatynda, Afrıka elderinde, Qytaıda sabaq beremin dep, muǵalimniń maskasyn kıgen sheteldik ustaz qara tizimde turǵan.
Halyqaralyq mektep basshylyǵy: «Osy oqıǵany tergeý kezinde sheteldik muǵalimniń buryn balalarmen qarym-qatynasyna qatysty keleńsiz aqparattar anyqtaldy. Krımınaldyq tekserý sharalary hattamaǵa sáıkes júrgizildi. Onyń sottalǵany, basqa da jazbalar anyqtalǵan joq».
Qaýipti muǵalimniń elordadaǵy halyqaralyq mektepke qalaı jumysqa qabyldanǵany belgisiz. Tek jaqynda Almatyǵa saıahattap barǵan kezinde onyń quıturqy áreketi áshkere boldy. Halyqaralyq mekteptegi máseleni bilim mınıstri de jaqsy biledi. Biraq Erlan Saǵadıev asyǵar emes, stýdentterge seksýaldyq zábir kórsetken ustazǵa qatysty mán-jaıdy áli qarastyryp jatyr.
«Men ony bilmeımin. Zaprosty jiberip, hat kelse mindetti túrde sizge jarıalaımyn. Ony qarastyrý kerek, ishinde ne bolǵanyn», - deıdi QR Bilim jáne ǵylym mınıstri Erlan Saǵadıev.
Nápsiqumar sheteldik ustazdy jumysqa qabyldaǵan halyqaralyq mekteptiń 31 memlekette fılıaly bar eken. Qazaqstannyń ózinde Astana, Almaty jáne Atyraý qalasynda bólimderi jumys isteıdi. Qyzmetten qýylǵan pedagog elden ketip qalǵan. Budan basqa bilim mınıstrligi de, aty dardaı mektep te eshqandaı málimet taratpady.
