«Álippe» oqý baǵdarlamasyna qaıta oralatyn boldy dep habarlaıdy Qamshy.kz aqparat agenttigi Qazaqstan telearnasyna silteme jasap.

Naqtyraq aıtsaq, kelesi jyly engiziledi. Bul týraly Aqtóbe jurtshylyǵymen kezdesý kezinde Bilim jáne ǵylym mınıstri Kúlásh Shámshıdınova málimdedi. Ata-analar qaýymy bul jańalyqty úlken qýanyshpen qabyldady.

Aıta keteıik, 2016 jyly elimizde bastaý synyptarǵa arnalǵan «Álippe» mektep baǵdarlamasynan alynyp tastalǵan  edi. Onyń ornyn «Saýat ashý» dep atalatyn oqýlyqtar almastyrdy. Bul ózgeriske halyqtyń basym bóligi qarsylyq bildirip, osy ýaqytqa deıin bul másele qyzý talqylanyp keledi.

Jańadan taǵaıyndalǵan Bilim jáne ǵylym mınıstri Kúlásh Shámshıdınova halyqtyń pikiri eskerilgenin jáne aıtqan talabyn aldaǵy oqý jylynda tolyq oryndaýǵa barlyq múmkindik bar ekenin aıtty.

Kúlásh Shámshıdınova: "Álippege baılanysty bıylǵy oqý jylynda úlgermeımiz. Kelesi oqý jylynda Álippe ornyna qaıta keledi. Jańa oqý jyly bastalýyna az ǵana ýaqyt qaldy. Qazir basqa kitaptar basyldy. Eldiń esin shyǵarmaı, kelesi jyly Álippeni qaıtaramyz. Bilimniń sapasy týraly ár mektep bilgenin jasaıdy dep aıtyp jatyrsyzdar. Olaı emes. Memlekette standart – bireý" - dedi.

"Mektepke sabaq berýge er azamattardy shaqyrý kerek. Balabaqshada, mektepte áıelderdiń tárbıesin alyp ósken balalar qyz sekildi bolyp barady. Úsh tildilikte balalarymyzdyń barlyǵy dúbara bolyp ketedi. Bala 12 jasqa deıin óz tilinde tárbıe alsyn, óz tilin tereń meńgersin. Bilim sapasy bizde nege tómendep ketti?! Ár mektep ártúrli baǵdarlamamen oqytyp, balanyń basyn shyrdaı qylady. Úıge bergen tapsyrmalardy ata-ana sheshe almaıtyn jaǵdaıǵa jettik. Álippe men ádebıetti qaıtarý kerek dep oılaımyn».- dedi aqtóbelik qoǵam belsendisi Kóshkimbaı Ahmetov.

Júıesi jıi ózgeriske ushyraıtyn jańa Bilim mınıstri  aldaǵy jańalyǵyn da aıtty.

"Mektepke er azamattardyń kelýi bizdi de oılandyrady. Kóp nárse mekteptiń basshysyna baılanysty. Kezinde men de mektep dırektory boldym. «Óz jumysyn aıtty» dep sókpeńizder. Sanap otyryp er azamattardy kóbeıttim. Sol sıaqty jumys jasaýymyz kerek. Qazir aýyldaǵy mektep muǵaliminiń tómengi jalaqysy 110 myń teńgeniń aınalasynda, ortasha jalaqy –160 myń, al aýyldaǵy 15 jyl ótili bar joǵary sanatty muǵalimder 190 myń teńgege deıin alady.

Men mundaı qarjyǵa er azamattar da mektepke jumysqa kele alady dep oılaımyn. Qaladaǵy jaǵdaıda 30 paıyzǵa tómen. Sebebi memleket aýyldy qoldap, jas mamandardyń aýylǵa barýy úshin osyndaı jaǵdaı jasap jatyr. Al tildik oqytý máselesi qaralatyn bolady. Álippege baılanysty, bıylǵy oqý jylynda úlgermeımiz, kelesi oqý jylynda Álippe ornyna qaıtyp keledi. Biz balalarǵa bilimdi ózi izdeýge úıretýimiz kerek. Osy jaǵynan súrinip jatyrmyz.

Sondyqtan qazir memleket 144 myń muǵalimdi oqytýǵa qarjy bólip otyr. Adamǵa eń qıyn nárse – artqan senimdi aqtap shyǵý. Sizderdiń aıtqan pikirlerińiiz meni kúnde uıyqtatpaıdy, osyny aqtaı alamyn ba, joq pa deımin",- dedi Bilim jáne ǵylym mınıstri Kúlásh Shámshıdınova.

Usynǵan: Maqpal Sembaı