Batyr Júkembaev kásipqoı bokstaǵy kezekti jeńisine qol jetkizdi, - dep habarlaıdy Qamshy.kz aqparat agenttigi sports.kz saıtyna silteme jasap.

Kanadanyń Monreal qalasynda ótken reıtıńtik jekpe-jekte óner kórsetken qazaqstandyq boksshynyń kezdesýi boks keshiniń basty oqıǵasy boldy. 

Júkembaev sharshy alańda meksıkalyq Hılberto Mesaǵa qarsy judyryqtasty. Byltyr naýryzda osy boksshy taǵy bir qazaqstandyq boksshy - Abylaıhan Qusaıynovtan jeńilgen edi. 

Birinshi jartylaı orta salmaqta ótken kezdesý tolyq 10 raýndtan turdy jáne tóreshilerdiń biraýyzdan shyǵarǵan sheshimi boıynsha qazaqstandyq boksshy jeńiske jetti. 

Jeńilissiz kele jatqan Júkembaev úshin bul kásipqoı bokstaǵy 15-shi jeńis. Sonymen qatar, ol alǵash ret jeti raýndtan joǵary kezdesý ótkizdi.

Negizinde Júkembaev basqa bir meksıkalyq boksshy - Karlos Hımenespen judyryqtasýy kerek bolǵan. Alaıda kezdesýge birneshe kún qalǵan ýaqytta qarsylasy aýysyp ketti. Bastapqyda Hımenespen Danıar Eleýsinov judyryqtasýy kerek bolǵan, alaıda ol Júkembaevty tańdaǵan.

Usynǵan: Maqpal Sembaı