Muhamedjan Tazabek Astananyń ataýyn Núr-Sultan bolyp ózgerýine qatysty pikir bildirdi dep jazady Qamshy.kz aqparat agenttigi. Bul týraly ol óziniń Instagram paraqshasyna jazdy.
"Nur - Sultan" dep elordanyń esimi ózgergenge menen biraz oqyrmandarym pikir surady. "Elbasy bılikten kete salyp, apyr-topyr qylmasa da, ýaqyt óte sheshiletin dúnıe edi, nege sonsha asyqtyrdy" degender de boldy...
"Men qarsymyn, xalyqpen aqyldaspady" degen de renishter paraqshama jazylyp jatty... Osy aıtylǵan suraqtar tóńireginde men ne oılaımyn..?
Ashyp aıtaıyn, maǵan keregi eldiń tynyshtyǵy, táýelsizdiktiń baıandylyǵy! Birjaqty jaýap bererdeı bıliktiń de ókili emespin, xalyqtyń atynan sóıleıtindeı de qaqym joq ekenin de jaqsy bilemin. Óz paraqshamda, óz oıymdy ǵana aıtaıyn...
Rýxanı aǵartýshylyqpen aınalysqasyn ba, aldyma ártúrli adamdar ártúrli problemamen kep jatady. "Oınastan bala kóterip qoıyp, ne isterin bilmeı júrgen boıjetken, ákesine qol kóterip qoıǵan sormańdaı bala, jubaıyn uryp múgedek qyp qoıǵan kúıeý, jesir áıeldiń úıin órtep jibergen maskúnem kórshi..." Kimmen kezdespedik, ne estimeı júr deısiz?! Aıta berseń aýzyń sharshaıdy, estı berseń júregiń qataıady. Álgindeı jandardyń áńgimesin á, dep estigende qabaǵyń túıilip, qanyń qaraıady...
Qatty aıtyp tastaýǵa bekinip nemese burylyp ketýge bel býa bastaısyń. Azdan soń onyń da ózińdeı pende ekenin, tyǵyryqqa tirelip, taıanysh izdep kelgenin, qapastan shyǵar jol tappaı, shybyn jany shyrqyrap turǵanyn sezgen kezde, sabańa túsip, sabyrǵa kep, álgi adamnyń janyna medet bolatyn, qutylýyna sebep bolatyn jaýap izdeı bastaısyń...
Basynda "bitken jeriń osy shyǵar, budan ári ne jaqsylyq bar deısiń, ábden tynǵan ekensiń" dep te, jerden alyp,jerge salǵyń keledi...
Biraq, musylmanshylyǵyń, qazaqı tárbıeń oǵan jibersin be, janyń ashyp, jibip, aqyldasyp, aldyn ashýǵa áreket ete bastaısyń... "Adasqannyń aldy jón, arty soqpaq" degen ras eken. Alla járdem etip, sol súringenderdiń kóbiniń sharýasy sheshilip, qateliginiń qıýy tabylyp, urysqandary tabysyp, ketkeni kelip, kemisi tolyp jatady. Qanshama múmkin emes, degen máseleniń oń sheshim tapqanyna kýá boldym, janyńdy shyjǵyrǵandaı bolǵan oqıǵalardyń arty xaıyrly bop, oń isterdiń bastaýyna aınalǵanyn kórdim...
Osy aıtylǵan jan túrshigerlik jaǵdaıattardan keıin de jaqsy kúnder sol pendelerdiń basyna kelgen bolsa, óz basym Astananyń aty aýysqanyn ondaı bir úlken qasiret, orny tolmas oısyraý, kópke qylǵan qıanat dep qabyldaı almadym. Bolar is bolǵan eken. Astananyń esimi asqaraly adamnyń atyna aýysqan eken. Erte me kesh pe bir bolatyn tirlik qoı. Haqtan xaıyryn suradym. Alladan berekesin suradym.
Bir mysal aıtaıyn. Jyl saıyn júzdegen adamdar meniń esimimdi uldaryna qoıǵanyn aıtyp jatady. Ótip ketken eshteńem joq. İshteı qýanasyń. Munyń qalaı, dep renjimeppin. Sizderde de ondaı bop turatynyna kúmánim joq. Aıdaladaǵy meniń atymdy týǵan balasyna qoıyp jatqan aǵaıynnyń áreketine qaraǵanda astananyń Nursultan atalýy júz ese ádiletti sheshim, dep oılaımyn!
Usynǵan: Ásel Bolatqyzy
