Mamyrdyń alǵashqy tańy ádettegiden aıryqsha ajarlanyp atqan sekildi kórindi bizge. Aqyn jyrlaǵandaı, «on bir uly bar úıdiń jasanǵan bir boıjetkeni boı kórsetkendeı sulý mamyr mezgiliniń keremetine kóz toımaıdy». Tóbeden meıirlene tókken araıly kúnniń shapaǵy aımaq-atyrapty tegis shattyqqa bólegendeı. Kókke qalyqtaǵan kóńildi áýen búgin erekshe meıram ekenin sezdirip tur. Leńgir qalasyndaǵy Tólebı alańyna qaraı qala turǵyndary asyǵyp kelýde. Tóle bı babanyń eskertkishi turǵan oryn jasandy sahna sekildi. Ónerpazdar ánnen shashý shashyp, kúmbirletip kúı tógýde. Iá, bıylǵy mereke basqasha formatta atalyp ótti. Alańda halyqtar dostyǵyn pash etetin stendiler men plakattar, kórme zattary kózdiń jaýyn alady. Mádenıet saraıynyń mańynda tigýli turǵan qazaqy kıiz keremet bezendirilipti. Ásirese, ulttyq kıim kıgen qyzdar men jigitterdiń júris-turysy qandaı jarasymdy. Kıiz úıden bylaı qaraı Tólebı aýdandyq túrik mádenı ortalyǵy ózderine berilgen buryshty bezendirýge bar ónerlerin salypty. Munan keıin nemis-slaván, kýrd, ózbek mádenı ortalyqtary jaıǵasypty. Kórmede árbir ulttyń ózindik ereksheligin aıqyndaıtyn qoldanbaly óner týyndylary, turmystyq salt- ádet-ǵuryptary boıynsha paıdalanatyn zattary, ulttyq taǵamdary, basqa da kóne buıymdary jaıǵasqan. Árbir ulttyq mádenı ortalyqtyń qasynda ulttyq kıimdegi etnos ókilderi án shyrqap, bı bıleýde. Tólebı aýdanynyń ákimi Áýelhan Turǵynbekov bastaǵan bir top komısıa músheleri aýdandaǵy ulttyq mádenı ortalyqtar usynǵan kórmelerdi aralap, tıisti baǵasyn berdi. Munan keıin saltanatty shara bastaldy. Aýdan basshysy alańǵa jınalǵan leńgirlikterdi ulyq meırammen quttyqtap sóz sóıledi. Aýdan ómirine belsene aralasyp, qoǵamdyq jumysta belsendilik tanytqan birqatar ulttyq mádenı ortalyqtardyń múshelerine alǵys hat tabys etti. Saltanatty sharada aýdandyq máslıhattyń hatshysy Átirhan Shyńǵysbaev jáne birqatar mártebeli meımandar quttyqtaý sóz sóıledi. Alańǵa jınalǵandar úshin merekelik baǵdarlama usynylyp, shara sońy jappaı serýenge ulasty.
"Aımaq tynysy"
