Bolashaq balańyzdyń jalaqysy kóp bolǵanyn qalaısyz ba? Onda siz mindetti túrde jeti sany bar kúni bosanýyńyz kerek! Búginde baqsy-balgerdiń ornyn almastyrǵan nýmerolog mamandary jas kelinshekterge osyndaı keńester berip álek. Al astrologtar juldyzdardyń ornalasýyna qaraı sábıińizdiń nege qyzyǵyp, qandaı salada jumys isteıtinine deıin aıtyp beremiz dep sendirýde. Bul qanshalyqty ras? Álde yrymǵa sengish qazaqty aldaýdyń kezekti bir tásili me? Buǵan qatysty sharıǵat ne deıdi? Bul týraly Qamshy.kz aqparat agenttigi Eýrazıa birinshi arnasynyń deregin negizge alyp habarlaıdy.

Búginde nýmerolog pen astrologtar quddy bir baqsy-balgerdiń ornyn almastyrǵandaı. Kókeıinde júrgen kez-kelgen suraqtyń jaýabyn tabý úshin halyq solarǵa júginetin bolǵan. Tipti, balany qaı kúni, saǵat neshede bosaný kerektigine deıin aıtyp beredi. Bir qyzyǵy, olardyń keńesine qulaq asyp, buljytpaı oryndaıtyndar jyl sanap kóbeıip barady eken.

"Meniń keserovaǵa bara jatqandyqtan, aı kún, sátti dep menen aıaǵy aýyr áıelder surap jatady. Al men sizge qandaı sandar mańyzdy, balanyń densaýlyǵynyń myqty bolǵandyǵy ma nemese baı bolǵany ma, qabiletti bolǵany ma, sodan keıin soǵan arnap, kún tańdaımyz. Solaı týyp jatady. Óıtkeni, sátti sandar bolady. Joly bolǵysh, 7-8 sany. Mundaı adamǵa kez-kelgen esik ashyq. Kóbine ata-analar sondaıdy tańdaıdy",- deıdi nýmerolog Quralaı Baqytqyzy

"Bala sportqa jaqyn bolsyn deseńiz 4-i kúni, saýsaǵynan bal tamǵan óner ıesi bolǵanyn qalasańyz 7-si kúni bosanǵanyńyz jón" deıdi nýmerologtar. Esimin kim dep qoıamyn dep basyńyz qatyp jatsa, oǵan da qam jemeńiz. Odan bólek, muǵalim, dáriger, tipti prezıdent bola ma, ony da eseptep, aıtamyz dep sendirip otyr. Bolmasa, kómekke astrologtar kelýge daıyn.

"Balanyń bolashaqta qandaı bolatynyn anyqtaý úshin biz Mars juldyzyn alyp qarastyramyz. Ol bizdiń barlyq qyzyǵýshylyǵymyzǵa jaýap beredi. Máselen,  eger  siz týǵanda, Mars planetasy  otty zodıak belgilerine sáıkes kelip tursa, onda siz sportqa jaqyn bolasyz degen sóz, zodıak belgińiz sýly bolsa, ónerge, al jerdegi belgide týylsańyz, demek  ǵylym men bilimge qyzyǵasyz. Keıin bolashaqta balasyna úıirme tańdaǵanda qatelik jasap, ókinip qalmaý úshin ata-analar maǵan kelip, astrologıalyq karta jasaıdy. Al men olarǵa durys baǵyt-baǵdar berýge tyrysamyn", - deıdi Arman Shtatpaev atty astrolog.

Qazaq burynnan yrymshyl halyq qoı. Jyldar boıy bala kótere almaı qalǵandar túrli aıla-tásilderge baratyn edi. Jas anadan balasynyń jórgegin suraıdy, kópbalaly ananyń ish kıimin urlaıdy, taǵysyn taǵy. Biraq, kóp kelinshek zamanaýı joldardy quptamaıtyn bolyp shyqty. Ony analar arasynda saýalnama júrgizý arqyly bildik.

Kishigirim saýalnama jasaǵan kezdiń ózinde  qyz-kelinshekterdiń deni bul máselede dindi alǵa tartyp otyr. "Bári adamnyń emes, Allanyń qalaýymen bolady" deıdi. Al buǵan qatysty sharıǵat ne deıdi?

"Kez-kelgen Qudaıdyń kúni ol sátti kún bolyp sanalady. Degenmen  dinniń ishinde de juldyznamaǵa baılanysty,álemniń úılesimine, garmonıasyna baılanysty  bir sandar bar.  Iaǵnı, jyldyń ýaqyttarynda nemese aptanyń kúnderinde bir sáttilik degen dúnıeler bar. Mysaly beısenbi kúni týǵan  balalar zerek bolady.    Juma kúni týǵandar dindar bolady nemese senbi kúni týǵan balalar kishkene jalqaýlaý bolady degen kózqarastar burynda da bolǵan", - dep pikir bildirdi dintanýshy Keńshilik Tyshqan.

Osylaısha, biz tildesken mamandardyń oıy qaq jaryldy. Biri balany sandardyń qudiretine súıenip, josparlap bosanǵan jón deıdi. Ózgesi buǵan úzildi-kesildi qarsy. Al dúnıe esigin áli ashpaǵan balanyń taǵdyryn arnaıy mamandardyń kómegine súıenip,  sheship júrgen ata-analardyń is-áreketi qanshalyqty qısyndy, ol jaıly baılamdy patsha kóńildi kórermenniń ózine qaldyrdyq!

Usynǵan: Ásel Bolatqyzy