15 mamyrda Petropavlda vagon shyǵarýmen aınalysatyn "Zıksto" zaýytynyń jumysshylary úsh aıǵa jaqyn jalaqylaryn almaǵandaryn aıtyp, narazylyq bildirdi. 14.30-ǵa qaraı 300-ge tarta jumysshy eńbekaqylaryn talap etip, zaýyt ákimshiliginiń aldyna jınaldy, dep jazady Qamshy.kz aqparat agenttigi azattyq.org saıtyna silteme jasap.

Zaýyt jumysy bıyl qańtardan beri toqtap tur. Jınalǵandar sózinshe, ákimshilik naýryzǵa deıin jalaqylarynyń jartysyn ǵana tólep kelgen. "Naýryzdan bastap aqsha tóleýdi múlde toqtatty" deıdi olar.

Narazylar nesıeleriniń paıyzy ósip, qaryzdarynyń kóbeıip jatqanyn aıtyp shaǵymdandy.

Azattyq tilshisiniń aıtýynsha, mańaıda polısıa avtobýstary turǵan. Bes-alty polıseı narazylardy baqylap júrgen. Zaýyt qyzmetkerleri jınalǵan soń ákimshilik narazylar arasynan on shaqty adamdy iriktep, ǵımarat ishinde sóılesti. Bir saǵatqa jýyq ýaqyttan soń zaýyt dırektory narazylar aldyna shyǵyp, 31 mamyrda jalaqynyń tolyq tólenetinin ýáde etti.

- Osyǵan deıin zaýytta jasalǵan kelisimsharttar tıimsiz bolyp shyqty. Reseıdegi quramdas bólshekter 2-2,5 ese qymbattap ketti. Ol jaqtaǵy basshylar baǵanyń kóterilýi boıynsha kelisimshartty qaıta qaraımyz dep sóz berdi. Osydan keıin zaýyttaǵy jumys jalǵasady. Eki aıdyń jalaqysyn 31 mamyrǵa deıin tóleımiz, - deıdi "Zıksto" zaýytynyń bas dırektory Renat Shamsýtdınov.

"ZIKSTO" zaýytynda 800-ge jýyq adam jumys isteıdi. Zaýyt dereginshe, mekemeniń jalpy qaryzy - 95 mıllıon teńge.

Usynǵan: Mıat Káshibaı