Obyr dertine shaldyqqan qazaqstandyq qyz Úndistannan elge qaıta almaı otyr. Bul - birneshe kún buryn shetelge em izdep attanǵan qazaq qyzynyń sońǵy armany dep jazady Qamshy.kz aqparat agenttigi Tengrinews.kz portalyna silteme jasap.
Almatylyq Dıana Ystybaeva qazir - 23 jasta. Osydan alty jyl buryn onyń shyntaq tustaǵy býynynan obyr belgileri anyqtalǵan edi. Bir jyl buryn asqynǵan dertke qarsy tura almaǵan dárigerler onyń qolyn ıyǵyna deıin kesýge májbúr bolǵan.
Almatylyq qyz birneshe kún buryn anasymen, aǵasymen birge Delı qalasyna emdelý maqsatynda barǵan-dy. Biraq sheteldik dárigerler de 4-dárejege deıin asqynǵan derttiń daýasyn tappady.
"Aýyr ekeni belgili. Biraq onyń eń sońǵy jan qalaýy – Qazaqstanǵa oralý. Dıana óte ádemi, ómirge qushtar qyz. "Ne úshin?" degen suraq basymyzdan keter emes. Ol oqydy, ómirlik jospar quryp, aldyna úlken maqsattar qoıdy.
Dıana aýyrǵan ýaqyttarynda da qulap ketpedi. Áıelder kıimin satatyn dúken ashyp, óz sharýasyn júrgize berdi. Al qazir mınýttar sanalýda. Bizdiń qyzymyz aýyr halde jatyr. Medısına qyzmetkerleri eshqandaı kómek kórsete almaıtynyn jetkizdi. Ol jolaýshylar tasymaldaıtyn ushaqpen ushýǵa jaramaıdy.
20-mamyr kúni biz Delıdegi QR elshiligine hat jazyp, qyzymyzdyń sońǵy ótinishin oryndaýdy suradyq. Búgin 23-mamyr. Bizdiń qyzymyz áli - Delıde. Ol týystarynyń janyna oralǵysy keledi. Dıananyń otbasy alty jyl boıy onyń emin qyńq demeı kóterdi. 11 mıllıon teńge turatyn jeke ushaq jaldaýdy qaltamyz kótermeı otyr. Ótinip kómek suraımyz. Bizdiń ótinishimiz aıaqasty bolmasa eken. Dıana Otanyna oralǵysy keledi", - dep jazdy qyzdyń ápkesi Anastasıa Evdokımova.
Birshama ýaqyttan keıin Anastasıa Evdokımova onyń suranysyn tek 28-mamyr kúni qanaǵattandyra alatyny týraly jaýap alǵanyn jarıalady. Al Dıananyń týǵan-týystary keshigip qalýdan qorqyp otyr.
QR SİM habarlaýynsha, quzyrly mekeme jaǵdaıdan habardar jáne qoldan keletin kómektiń barlyǵyn jasaýdy qarastyryp jatyr.
"Biz Delıdegi elshilikten bul jaıt týraly aqparatty 20-mamyr kúni aldyq. Sol mezette bul másele Densaýlyq saqtaý mınıstrligine jiberildi. Qazir sol jaqtaǵy áriptesterimiz arnaıy reıs jiberýdi jedeldetý úshin otandasymyzdyń tilegin oryndaý úshin barlyq qyzmetti jasap jatyr.
Aıta ketetin bir másele bar. Bizdiń ushaqtarymyzdyń barlyǵy Úndistanǵa Pákistan arqyly ushady. Al Pákistannyń áýe shekarasy jabyq. Arnaıy ushaq ol jaqqa deıin qandaı baǵytpen ushyp baratyny anyqtalý ústinde. Otandasymyzdyń tilegin oryndaý úshin bar múmkindigimizdi qoldanamyz", - dedi SİM ókili Aıbek Smadıarov.
Aýdarǵan: Ádilet Mádenıet
