Mańǵystaýlyq belsendi jastar jazǵy lagerde bas qosty. Sharanyń basty maqsaty - jastar jylynyń aıasynda myń jyldyq tarıhy bar Mańǵystaý ólkesiniń taǵylymyn keıingi urpaqqa dáripteý, tarıhı sana qalyptastyrý, árbir jasty otansúıgishtik pen jaýapkershilik sezimge tárbıeleý, tól mádenıetimizdi óskeleń urpaqtyń boıyna sińirý. «Kógez» etno aýylynda uıymdastyrylǵan lagerge jastar uıymdarynyń ókilderi, erikti jastar, múmkindigi shekteýli jastar,   daryndy mektep oqýshylary, jas kásipkerler men vaınerler qatysty. Jalyndaǵan óńir jastaryna qoldaý kórsetip, demeý bolý úshin oblys ákimi Eraly Toǵjanov ashyq aspan, tabıǵat aıasyndaǵy sharaǵa qatysty. Beıresmı formattaǵy kezdesýde jastar óńir basshysymen erkin taqyrypta suqbattasyp, kókeıtesti saýaldaryn qoıdy. Sonymen qatar, týrızm jáne aýyl sharýashylyq salalaryndaǵy mańyzdy ıdeıalaryn tyńdap, jastar júzege asyrǵan tabysty jobalarmen tanysty. Eraly Toǵjanov: «Mańǵystaý ataýynyń Myńjyldyǵy kúni keshe oblys kóleminde bastaý aldy. Bul -  rýhqa taǵzym, ata-baba amanatyn oryndaý, jetkinshek urpaqqa ónege, tarıh úshin tuǵyrly beles dep esepteımin! Sizder de  osy bastamany qoldap, ári qaraı jalǵastyrady dep senemin. Bárimiz birge atsalysyp, ata-babalarymyzdyń aldyndaǵy paryzdy abyroımen oryndaýymyz qajet» - dedi. Aımaq basshysy erekshe atap ótken taǵy bir jáıt - jastardyń arasyndaǵy eriktiler toby. «Muqtaj jandarǵa kómek kórsetip, olarǵa qýanysh syılaý – eń úlken baqyt. Jaqynda Qazaqstan Respýblıkasynyń Prezıdenti Qasym-Jomart Toqaev Qostanaıda ótken eriktiler forýmynda mańǵystaýlyq erikti jastardyń qyzmetin joǵary baǵalap, erekshe atap ótken bolatyn. Osy oraıda men de oblystyq jastar resýrstyq ortalyǵy janyndaǵy «Eriktiler korpýsyna» abyroıly qyzmetteri úshin alǵys aıtamyn.  Jalpy, meni qýantatyny erikti jastardyń qatarynyń kóbeıýi. Jýyrda Beıneý aýdanynda 10 jyl buryn mektep bitirgen túlekter jınalyp, jaǵdaıy tómen otbasyǵa úı alyp bergen. Bul úlken bastama. Ramazan aıynda mundaı saýapty isti jasaǵan jastarymyz kópke úlgi» ekenin erekshe atap ótti. Lagerde ulttyq oıyndar (asyq atý, arqan tartý, jamby atý, kókpar, toǵyzqumalaq, urshyq ıirý, aýdaryspaq, teńge ilý) oınatylyp, Sherqala - Aıraqty taýy, Qyzyl qala tarıhı jerine jastar saıahaty jáne jastardyń ekologıalyq aksıasy uıymdastyryldy. Aǵash úı mańyna daryndy sýretshi Bekejan Mereıdiń kartınalary qoıylyp, «Óner» koleji sýretshileriniń pleneri usynyldy.

Jastar ár topqa bólinip, týrızm jáne kásipkerlik taqyrybynda semınar trenıńke qatysyp, jobalarmen jumys jasady. Kezdesý sońynda óńir basshysy jastarmen birge «Keshki alaýǵa» qatysyp, aqyl-keńesimen bólisti.