Mańǵystaýlyq Laýra Turǵanbaeva ótken aıda ǵana «Bastaý» jobasy boıynsha kásipkerlik kýrsyn támámdaǵan. Bir aılyq oqý barysynda bıznesti bastaý jáne sony saýatty júrgizý, salyq tólemderi men nesıe, kásiptiń kirisi men shyǵynyn durys esepteý syndy túrli ádisterdi tolyq meńgerdi. Buryn aǵylshyn tili muǵalimi bolyp eńbek etken ol keıingi jyldary jumyssyz qalǵan edi. Qol qýsyryp otyrǵansha aýyldyń qyz-kelinshekterin árleýge ynta bildire bastady. Kásip ashyp, elden erekshe qyzmet kórsetetin sulýlyq salony bolǵanyn armandady. Asqaq armany aldamady. Úsh balanyń anasy otbasymen kásipti qatar alyp júrýge bel baılady. Sóıtip, Munaıly aýdanynyń Qyzyltóbe aýylynan eldi mekende oǵan teń túser básekelesi joq sulýlyq stýdıasyn saltanatty túrde ashty. 10 adamdy turaqty jumyspen qamtamasyz etti.

Sán-saltanaty kelisken salonda joǵary deńgeıde qyzmet kórsetiledi. Shash qıý men sándeý, bet árleý, tyrnaq pen qas retteý sıaqty qyz-kelinshekterge qajetti qyzmet túriniń bárin jasaıdy. Salon sońǵy úlgidegi jıhazdarmen jabdyqtalyp, jańa ári ozyq tehnıkamen jaraqtanǵan.Bul kásiptiń basqalardan artyqshylyǵy da sonda.Jas kásipkerdiń aıtýynsha, jumysshylardyń jalaqysy men ǵımarattyń jaldaý tólemin qospaǵanda aıyna shamamen 250 myń teńge tabys tabýdy kózdep otyr. Sapaly qyzmet kórsetý arqyly tutynýshy sanyn arttyrmasaq, kemitpeımiz degen senimdemiz,- deıdi ol.

Laýra stýdıasyna tutynýshylardy aldyn ala jazylý arqyly qabyldaıdy. Ózi barlyq qyzmet túrin ıgergen has sheber. Jumysshylarynyń kóbin ózi úıretip, oqytyp alǵan. Munda qyzmet quny da qaladan áldeqaıda arzan. Aýylǵa arnalǵan baǵany ustap turmyz,- deıdi sheberler.

«Qyz-kelinshekterdiń ýaqytyn únemdeý maqsatynda tutynýshyǵa bir mezgilde birneshe qyzmet kórsetip, hanymdardy adam tanymastaı jarqyratyp shyǵaryp salamyz.Ár salanyń sheberleri bólek bolǵandyqtan jyldam ári sapaly jumys jasalǵanyn qatań qadaǵalaımyn»,- dep oıymen bólisti Laýra Turǵanbaeva.

Endi mundaı sulýlyq stýdıalarynyń qataryn aýdan boıynsha kóbeıtý josparda bar. Aýyldyń qyz-kelinshekteri ortalyqta, qalada kórsetiletin joǵary ári sapaly qyzmetterdi aýyldan uzamaı, alysqa sabylmaı-aq osynnan alatyn bolady.