Qazaqstannyń bas sanıtarlyq dárigeri Jandarbek Bekshın eldiń ońtústik óńirinde turǵyndar Kongo-Qyrym gemorragıalyq qyzbasyn juqtyrǵanyn aıtty dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

"9 jaǵdaı tirkeldi. Qyzylorda oblysynda 4 adam jáne Túrkistan oblysynda 4 adam juqtyrǵan. Taǵy bir adam bul aýrýdy Ózbekstan Respýblıkasynan juqtyrypty", - dedi ol ortalyq komýnıkasıalar qyzmetinde ótken brıfıńte.

Osy oraıda Jandarbek Bekshın shetelge shyǵatyn qazaqstandyqtarǵa saq bolýǵa keńes berdi.

"Óte juqpaly aýrýlardyń bar ekenin esten shyǵarmaýymyz kerek. Mysaly, denge bezgegi. Sońǵy eki jylda 9 qazaqstandyq týrıs osy aýrýǵa shaldyqty. Qazaqstandyqtar Úndistan, Taıland, Vetnam, Sıngapýrde bolyp, ekzotıkalyq dertti juqtyrǵan", - dedi bas sanıtarlyq dáriger.