Sodan keıin, premer-mınıstr Alashtyń ardaqty uly, asa kórnekti qalamger Ábish Kekilbaıulynyń qurmetine arnap salynyp jatqan rýhanı ortalyqta boldy. Jazýshynyń mádenı qundylyqtary men eńbekterin máńgi este saqtaý jáne nasıhattaý maqsatynda qurylǵan ortalyqtyń aýmaǵy 10 gektardy quraıdy. Osy jyldyń qazan aıynda rýhanı ortalyqta ornalasatyn murajaıdyń qurylysyn tolyq aıaqtaý, al keler jyly nysandy paıdalanýǵa berý josparlanyp otyr.

Sonymen qatar, jumys sapary barysynda Úkimet basshysy «Shlúmberje», «Kaspıı Bıtým», «Kaspıı» sý tushshytý zaýyty sekildi shahardaǵy birneshe iri kásiporyndardy aralady. Munaı óndirýshi kásiporyndarǵa qyzmet kórsetetin «Shlúmberje» kompanıasynyń óndiristik qýaty jylyna 1000 nasos qondyrǵysyn shyǵarady. Al, «Kaspıı Bıtým» zaýyty jylyna 1 mıllıon tonna munaı óńdep, osy jyldyń ózinde 151 myń tonnadan astam sapaly jol bıtýmyn shyǵarǵan. Osydan keıin Asqar Mamın Aqtaý qalasyndaǵy óndiristik aımaq pen Qaraqıa, Munaıly aýdandaryn aýyz sýymen qamtamasyz etip otyrǵan «Kaspıı» sý tushshytý zaýytynda boldy. Jobalyq qýaty táýligine 25 000 tekshe metr sý shyǵarady.

Sondaı-aq, Úkimet basshysy Kaspıı jaǵalaýynda ornalasqan elimizdegi eń iri kýrorttyq keshenniń qurylysymen tanysty. Aqtaýdan 20 shaqyrym jerde 160 gektar aýmaqty alatyn  demalys aımaǵy 2020 jyly paıdalanýǵa beriledi dep josparlanyp otyr.