Balalardyń bir sáttik qýanyshy úshin sanaly ǵumyryn beınetke jumsaǵan ulttymyzda bala tárbıesiniń orny bólek. Tipten dýmandatyp ótkizetin dúbirli toıynyń alǵashqy bastaýy da balanyń ómirge kelýimen baılanysyp jatady. Osy úrdisti jalǵaǵan túrkistandyqtar balalar merekesine oraı keshendi is-shara jasap, sonyń aıasynda dataly kúndi keń kólemde atap ótti.
Tańerteń ortalyq Esimhan alańynda bastaý alǵan sharada balalarǵa merekelik kóńil-kúı syılaıtyn merekelik shaǵyn konsert pen túrli saıystar uıymdastyryldy. Budan soń arnaıy syı-sıapatqa toltyrylǵan kólikter 100-den astam múgedek balalardyń úılerine merekelik bazarlyq taratýǵa jol tartty.
Osylaısha jalǵasyn tapqan búldirshinderdiń qýanyshty kúni resmı sharamen jalǵasty. Qalalyq mádenıet úıinde ótken «Bar jaqsylyq – balalarǵa» atty konserttik baǵdarlamanyń alǵashqy bóliminde qala ákimi balalardy quttyqtap, mektep oqýshylaryna alǵys hattar men baǵaly syılyqtar tabys etti. Shahar basshysynyń aıtýynsha búl kúni jalpy sany 500 balaǵa túrli deńgeıde qoldaý kórsetilmek. Sonyń ishinde, jazǵy demalys lagerlerine 163 balaǵa tegin joldama berilse, 128 bala kıim-keshekpen qamtyldy. Sonymen birge, mundaı qoldaýlardan balabaqsha búldirshinderi de qur qalǵan joq. Aıta keterligi, sońǵy jyldary Túrkistanda balalardy balabaqshamen qamtý jumystary qarqyndy júrgizilip keledi. Sonyń nátıjesinde 2009 jyldan beri 43 bilim mekemeleri búldirshinderge esik ashyp, osy ýaqyt aralyǵynda balalardy mektepke deıingi mekememen qamtý 13 paıyzdan 76,5 paıyzǵa artqan. Aıta bersek, 22 mekteptiń jańa ǵımaraty da osy jyldar ishinde paıdalanýǵa berilip úlgergen. Aıta ketý kerek, mereke kúninde balalar qýanyshyn eseleı túsý úshin jalpy kólemi 6 mln-ǵa tarta qarjy jumysalǵan. Onyń ishinde balalar demalysy úshin 2,8 mln. teńgesi jergilikti búdjetten qaralsa, qalǵan qarjy qaladaǵy jany jomart jandardyń esebinen berilgen.
Mine, osyndaı jan jadyratar jańalyqtary kóp merekede kıeli óńirdegi oblystyq balalardy ońaltý ortalyǵynyń tárbıelenýshileri de shat-shadyman qýanyshqa bólendi. Tarıhı-mádenı etnografıalyq ortalyqta balalarǵa qýanysh syılaǵan sharada búldirshinder óz rızashylyqtaryn zor qoshemetimen jetkizdi.
Túrkistan qalasy ákiminiń baspasóz qyzmeti
