Bank aldyndaǵy bereshegi qysqarǵandar arasynda áleýmettik hal-ahýaly tómen azamattarmen qatar kredıtti ózi jabýǵa qaýqarly qaltasy qalyń bıznesmenderdiń de bolýy buqaranyń biraz ashýyn týdyrýda.
Kredıti keshirilgenderdiń biri "Atameken" ulttyq kásipkerler palatasy tóraǵasynyń orynbasary Oljas Ordabaev. Onyń smartfon úshin alǵan 115 myń teńgesi jabylǵan. Alaıda kásipker bul týraly eshkimnen suramaǵyn aıtýda. Memleket aýdarǵan 115 myń teńgeni qaıtaryp bermek bolǵan oǵan onyń múmkin emestigin aıtqan. Kásipker endi ol qarajatty qaıyrymdylyqqa jumsamaq nıette. Oljas Ordabaevtyń nesıesi Kaspi bankinde bolypty.
Atalǵan qarjylyq uıym turǵyndardyń qaryz júktemesin jeńildetý sharalary maýsym aıynda jarıalanǵan tártipke saı júrgenin málim etti. Boryshkerdiń bereshegin óteý úshin problemalyq nesıeler qory azamattarǵa kredıt bergen árbir bank pen shaǵyn qarjy uıymdarymen kelisimge otyrǵan. Iaǵnı kredıtti keshirý sharalary úkimet bekitken josparǵa saı arnaıy tártip boıynsha júzege asqan.
Eskerte ketelik, banktik amnıstıaǵa engen azamattar alty kategorıa boıynsha tańdalǵan:
- kópbalaly otbasylar (18 jasqa deıingi 4 jáne odan da kóp balasy barlar);
- asyraýshysynan aıyrylǵany úshin ótemaqy alatyndar;
- múgedek balalary bar otbasylar, bala kúnnen múgedektegi bar 18 jastan asqandar;
- memlekettik áleýmettik kómek alatyndar;
- jetim balalar;
- ata-ana qamqorlyǵynsyz qalǵan balalar, ata-anasynan kámletke deıin aıyrylǵan 29 jasqa deıingi azamattar;
Osy atalǵan sanatqa enetin Qazaqstan azamattary áleýmettik jaǵdaıyna qaramastan kredıtti keshirý aksıasyna avtomatty túrde qatysqan bolyp tur. Ulttyq kásipkerler palatasy tóraǵasynyń orynbasary solardyń biri.
Alaıda eskere keterlik jaıt, joǵarydaǵy kategorıaǵa kiretin turǵalardyń ishinde 1 maýsymnan keıin nesıe alǵandar, jalpy qaryzy 3 mln. teńgeden asatyndar, qaryzdary kolektorlyq uıymdarǵa ótip ketkender nesıelik amnıstıaǵa ilinbeıdi. Kóptegen túsinispeýshilikter osy talaptardy bilmegenniń saldarynan týyp jatyr.
