Eńbek jáne halyqty áleýmettik qorǵaý mınıstrligi zeınetaqy qoryndaǵy aqshanyń bir bóligin paıdalanýǵa qatysty usynystar ázirlep, qoǵamdyq talqylaýǵa shyǵarady. Bul týraly búgin premer-mınıstrdiń birinshi orynbasary – qarjy mınıstri Álıhan Smaıylov málimdedi dep habarlaıdy Qamshy.kz aqparat agenttigi Sputnik Qazaqstan saıtyna silteme jasa.

Mınıstr prezıdenttiń joldaýyn iske asyrý jónindegi jalpyulttyq is-sharalar josparynda zeınetaqy jınaǵyn paıdalanýǵa qatysty tapsyrma bar ekenin atap ótti.

"Úkimetke halyqtyń jekelegen sanattaryna zeınetaqy qoryndaǵy aqshanyń bir bóligin baspana men bilimge jumsaýǵa ruqsat berý týraly tapsyrma berildi. Eńbek jáne halyqty áleýmettik qorǵaý mınıstrligi múddeli organdarmen birlesip, tıisti usynystardy ázirleıdi. Olar bekitilgen merzimde qajetti usynystardy daıyndap, qoǵamdyq talqylaýǵa shyǵarady dep oılaımyn", - dedi Smaıylov úkimet kýlýarynda.

Ol zeınetaqy jınaǵyn qordaǵy shotta aqshasy bar qazaqstandyqtar ǵana ala alatynyn aıtty.

Osy oraıda jýrnalıser mınıstrden kelesi jyldan bastap qazaqstandyqtar zeınetaqy jınaǵyn paıdalana ala ma dep surady.

"Aldymyzda osyndaı mindet tur", - dep qysqa qaıyrdy Smaıylov.

Eske sala ketsek, 2 qyrkúıekte Qasym-Jomart Toqaev Qazaqstan halqyna alǵashqy joldaýynda úkimet pen Ulttyq bank zeınetaqy júıesiniń tıimdiligin arttyrýy qajet ekenin aıtqan bolatyn. Prezıdent úkimetke jyldyń sońyna deıin jumys isteıtin adamdardyń zeınetaqy jınaǵynyń bir bóligin maqsatty paıdalaný máselesin pysyqtaýdy tapsyrdy.