2019 jyly josparlanǵan 13 jobanyń ishinde jalpy quny 976 mln. teńge bolatyn 2 joba paıdalanýǵa berildi. Eki jobanyń arqasynda 37 jumys orny quryldy. Olar bıtým emýlsıasy negizinde gıdro oqshaýlaǵysh materıaldardy óndiretin «SatexChemie» JSHS jáne «Best group» jel elektr stansıalaryn salý mekemesi. Keler 2020 jyly 119 mlrd teńgege 11 jobany iske qosý josparlanǵan. Nátıjesinde 1500-1700-deı jańa jumys oryndaryn ashý kózdelip otyr. 

Aıta keteıik, qazirgi ýaqytta Mańǵystaý oblysynda 840 sheteldik kompanıa jumys isteıdi.

-«Mańǵystaýda ınvestısıalyq ahýal jaqsy. Qysqasha toqtalsam, qańtar –tamyz aıynyń aralyǵynda Mańǵystaý oblysynyń ónerkásip kórsetkishiniń negizgi kólemi 98,8% qurap otyr. Ózderińiz biletindeı Mańǵystaý oblysynyń ónerkásibiniń 90% úlesi taý-ken óndirýshi kásiporyndar, ıaǵnı munaı mekemeleri bolyp tabylady»,- dedi Mańǵystaý oblystyq ındýstrıalyq-ınnovasıalyq basqarmasy basshysynyń orynbasary Talǵat Ábdiqadyrov.

Mańǵystaý oblysynda 2020 jylǵa josparlanǵan  aıryqsha mańyzdy jobalar:

1. Túrkıalyq ınvestorlardyń bastamasymen Aqtaý qalasynyń aýmaǵynda quny 60,8 mlrd.teńge bolatyn týrısik qonaq úı kesheniniń qurylysy qarqyndy júrgizilýde. 2020 jyldyń aıaǵyna deıin 1-kezeńi iske qosylmaq. Nátıjesinde 600-den astam jańa jumys orny ashylady dep kútilýde.
2. Sıngapýrlyq "WestGasOil” (ÝestGazOıl) kompanıasynyń bastamasymen quny 684 mlrd.teńgeni quraıtyn «Metanol jáne olefın óndirý» zaýyty iske qosylady dep josparlanǵan
3. Quny 76 mlrd.teńge bolatyn shoıyn óndiretin metalýrgıalyq zaýyttyń qurylysyn «Tehnogran-Aktóbe» JSHS salýdy qolǵa alǵan.
4. «Mańǵystaý Oıl Refaınıng» JSHS quny 7,6 mlrd.teńge bolatyn «Munaı Óńdeý Zaýyty» qurylysyn júrgizýdi josparlap otyr.