Jyr jampozy, qazaq poezıasynyń jaryq juldyzy İlıas Jansúgirovtiń 125 jyldyq mereıtoıyna oraı týǵan jeri Almaty oblysynyń Jansúgirov kentinde aqynnyń 5 metrlik eńseli eskertkishi ornatyldy dep habarlaıdy Qamshy.kz aqparat agenttigi Almaty oblysy ákiminiń baspasóz qyzmetine silteme jasap. 

Dúbirli toıdyń betashary bolǵan saltanatty sharaǵa oblys ákimi Amandyq Batalov, Olımpıada chempıony, Qazaqstannyń Eńbek Eri, mesenat Jaqsylyq Úshkempirov, QR eńbek sińirgen qaıratkeri, tanymal jýrnalıs Nurtileý Imanǵalıuly, Qazaqstan Jazýshylar odaǵy tóraǵasynyń birinshi orynbasary Aqberen Elgezek jáne birqatar qoǵam qaıratkerleri, aqyn-jazýshylar, aýdan halqy qatysty. Eskertkishtiń shymyldyǵy túsirilip, aqynǵa taǵzym sharalary atqarylǵannan keıin sóz alǵan oblys ákimi Amandyq Batalov dúbirli toıdyń bastalýymen barsha qaýymdy quttyqtady. "Búgin týǵan jeriniń tórinen İlıas aqynǵa arnalyp eńseli eskertkishi ornatylyp otyr. Bul - eliniń tarlan talantqa degen qurmeti, eren erge degen taǵzymy dep bilemiz. Aqyn shyǵarmalarynan Qulagerdiń dúbiri, dalanyń jyry, qobyzdyń úni, dombyranyń kúmbiri esip turady. Osy danalyq izi, ulylyq bıigi - urpaqtyń oıyna qýat, boıyna nár beretin baǵa jetpes baılyq. Bul oraıda Elbasynyń "Rýhanı jańǵyrý" baǵdarlamasy áleýmettik-mádenı salalardyń tyń serpinmen damýyna erekshe yqpal etip otyr. Mesenattardyń ekonomıkanyń basqa salalarymen qatar, mádenıetke qoldaý kórsetýi rýhanıatqa qyzmet etkeni dep túsinemiz. Ásirese, kásipker azamattar baǵdarlamany júzege asyrýǵa, týǵan jerin kórkeıtýge belsene atsalysyp keledi. Búgingi shara - sonyń aıqyn kórinisi", - dedi Amandyq Batalov.

Sondaı-aq, oblys ákimi osyndaı ıgi istiń atqarylýyna muryndyq bolǵan mesenat pen músinshiniń eńbegin erekshe atap ótti.  Munan soń sóz alǵan ardager jýrnalıs Nurtileý Imanǵalıuly qazaqtyń mańdaıyna bitken úsh arysynyń - Sáken, İlıas, Beıimbettiń bólinbeıtin úsh tuǵyr ekendigin eske sala otyryp, bul mereıtoıdyń ilıastaný salasyna tyń serpin, jańa bir tynysyn ashyp bergenin aıtty. Aqynnyń 20 tomdyǵyn shyǵarý, "İlıas izimen" ekspedısıa quryp, Máskeýge saparyn uıymdastyrý sharalaryna qoldaý kórsetken, mereıtoıdyń keń kólemde, joǵary deńgeıde ótýine muryndyq bolǵan oblys basshylyǵyna kóptiń atynan rızashylyǵyn jetkizdi. Sonymen qatar tól perzentimizdiń toıy dep bar yqylas-peıilderin tanytqan aqsýlyqtarǵa da shyn kóńilden alǵys aıtty. Sondaı-aq aqynnyń toıy budan ári Taldyqorǵanda, Almaty men Nur-Sultan qalalarynda jáne TÚRKSOI uıymynyń qoldaýymen Túrkıada ótetinin qýanyshpen jetkizdi. 

Eskertkish aldynda aqyn toıyna joldaǵan Memlekettik hatshy Qyrymbek Kósherbaev pen Almaty qalasy ákiminiń orynbasary Erjan Babaqumarovtyń quttyqtaý telegrammalary oqyldy.  Qazaqstan Jazýshylar odaǵy Basqarma tóraǵasynyń orynbasary Baýyrjan Jaqyp búgin alash arysynyń tuǵyryna qaıta qonǵan tarıhı kúni ekenin aıta kelip, aqynǵa óleń arnady. Al jetisýlyq ardager, Almaty oblysynyń Qurmetti azamaty, qarymdy qaıratker Naýryz Qylyshbaev aqynnyń "Jetermiz be tilekke" atty óleńin taǵdyrymen ushtastyra otyryp oqyp, murasynyń máńgilik ekenin atap ótti.  Osy jıynǵa Qyzyljar ólkesinen arnaıy kelgen Beıimbet Maılınniń nemeresi Dámen Ábilqasymqyzy da sóz alyp, kezek-kezegimen tutqyndalyp ketken úsh arystyń artynda qalǵan jubaılarynyń bir-biriniń balalaryna qalaı qamqorlyq tanytqany, qıyn sátterde bir-birine súıeý, demeý bola bilgeni týraly áserli estelikterimen bólisti. "Sáken, Beıimbet, İlıas atalarymyzdyń toıy - barsha qazaqtyń ortaq toıy", - dedi D.Ábilqasymqyzy. Atap ótsek, Jansúgirov kentiniń ortalyq alańyna qoıylǵan eńseli eskertkishtiń avtory - Qazaqstan Sáýletshiler odaǵynyń múshesi, Mádenıet salasynyń úzdigi, músinshi Qazbek Dýlatov. Eskertkishtiń daıyndalýyna qarjylyq qoldaý kórsetken mesenat - Moldıar Nurbaev.

Budan ári toı Jansúgirov kentindegi ortalyq stadıonda teatrlandyrylǵan sharamen jalǵasty. Osy ortada kópshilikke jyly lebizin bildirgen oblys ákimi Amandyq Batalov oblystaǵy rýhanıat salasynda, tarıhty taný baǵytynda atqarylyp jatqan sharalarǵa qysqasha toqtalyp ótti. Kúni keshe Qarasaı batyrǵa eńseli eskertkish qoıylsa, búgin İlıas aqynnyń aty ardaqtalyp, granıtten quıylǵan músininiń tuǵyrǵa qonǵanyn tilge tıek etti. Aqsý óńirindegi ekonomıkalyq, rýhanı ilgerileýshilikterdi bılik pen halyq árdaıym birlesip atqaryp otyrǵanyn da aıtty. Aldaǵy ýaqytta da eldiń berekesimen, kóptiń kómegimen budan da aýqymdy ister atqarylatyndyǵyna senim bildirdi. Osy sahnada ilıastanýshy ǵalymdar Muratbek Imanǵazınov pen Kámılá Qoqymovanyń aqynnyń ómiri men shyǵarmashylyǵyna qatysty arhıv derekteri boıynsha daıyndalǵan zertteý kitaptarynyń tusaýy kesildi. Mereıtoı aıasynda aqynnyń "Qulager" shyǵarmasy belgili rejıser, QR eńbek sińirgen qaıratkeri, profesor Sáýlebek Asylhanulynyń senarıimen daıyndalyp, rejıserligimen sahnalandy. Basty rólderdi Beıbit Qarmanov, Asqar Muqıat, Maıra Omarova syndy belgili akterlar somdap, jergilikti óner ujymdary atsalysty, bir tynyspen, keremet úılesimmen qoıylǵan kórinis stadıon toly kórermenderdiń kóńilin erekshe áserge bóledi. Osy kúni sportsúıer jastar kókpardyń kórigin qyzdyrdy. Aqynnyń arýaǵyna arnap as berildi. "Dala dastany" spektakli qoıyldy.  

Eske salsaq, mereıtoılyq sharalar erteń Taldyqorǵanda jalǵasyp, toı qonaqtary mýzeı, kitap, sýret kórmelerin tamashalaıdy, aqyn shyǵarmalarynyń 20 tomdyǵynyń tusaýy kesilip, respýblıkalyq ǵylymı-tájirıbelik konferensıa ótedi. Respýblıkalyq jazba aqyndar músháırasynyń jeńimpazdary marapattalyp, "Taldyqorǵan" ıpodromynda ulttyq at sporty túrlerinen jarystar uıymdastyrylyp, İ. Jansúgirov Mádenıet saraıynda merekelik konsert bolady.