İshki ister mınıstri Erlan Turǵymbaev Tergeý departamentiniń jańa basshysyn tanystyrdy dep habarlaıdy Qamshy.kz aqparat agenttigi vedomstvo baspasóz qyzmetine silteme jasap. 

Prezıdent Ákimshiliginiń kelisimi boıynsha İshki ister mınıstrligi Tergeý departamentiniń basshysy qyzmetine polısıa polkovnıgi Sanjar Ádilov taǵaıyndaldy.

Sanjar Ádilov 1977 jyly týǵan. İshki ister organdarynda 1999 jyldan beri qyzmet etip keledi. Basshylyq qyzmetterde tájirıbesi mol. Túrli jyldary quqyq qorǵaý organdarynyń (ishki ister men qarjy polısıasy) tergeý bólimshelerinde, İİM tergeý departamentinde jumys istegen. 

2013 jyldan beri Nur-Sultan men Almaty polısıa departamentteri basshysynyń orynbasary qyzmetin atqaryp keledi.

Turǵymbaev mınıstrliktiń ortalyq apparaty qyzmetteriniń basshylaryna el Prezıdentiniń qylmyspen kúres, halyqtyń tynyshtyǵy men qaýipsizdigin qamtamasyz etý jóninde tapsyrmalaryn eske saldy. "Tergeý bólimsheleri qylmystardy jyldam ári tolyq ashý men tergeýdi, halyqtyń konstıtýsıalyq quqyǵyn qorǵaýdy, jaza qoldaný qaǵıdasyn qamtamasyz etýi kerek", - dedi mınıstr.