El jaılaýǵa kóshkende... Osy tirkes janyma sondaı jaǵady. Kóshpeli halyqtyń urpaǵy bolǵandyqtan, jaılaý degen sózdi estı qalsam, qanymnyń titirgengish talshyqtary qozǵalyp baryp, dármensizdikten qaıta qulaı qalatynyn sezinemin. Zaman ózgergen. Saıası júıe men arpalystardyń kesirinen qazaq ta ózgergen. Biz burynǵy babalarymyzsha eldiń jaılaýǵa kóshýin saǵyna kútpeımiz. Biz úshin kósh sondaılyq kóńildi saltanat bolýdan qalǵaly qashan? Aqıqatynda qazaqtyń dástúrli ánderiniń 80 paıyzynda kósh saltanaty mindetti túrde tilge tıek bolady. Demek, ol uǵym bizdiń ajyramas bir bóligimiz bolǵandyǵyn dáleldep jatýdyń ózi artyq. Qos ǵashyqtyń arasyndaǵy qımastyq nemese saǵynysyp tabysý sekildi mahabbat sújetteriniń barlyǵy aýyldyń kóship-qonýyna qatysty baıandalady. Biz qazir jılaýǵa shyqpaımyz. Jelidegi qulynnyń kisinegini men kóleńke izdep shybyndaǵan jylqynyń kórinisi kóz aldymyzda kólbeńdemeıdi. Búgingi qazaqtyń jaılaýy- Antalıa , Bodrým, Alaná, Haınan araldary, Taıland,
Dýbaı men Abý-Dabı. Baıqap qarasaq, burynǵy qazaqqa qaraǵanda búgingi qazaqtyń keńistigi ájepteýir aýqymdalǵan. Jaz shyǵa salysymen juldyzdarymyzdyń sol óńirde júrgenin jarysa jazamyz. Úkimetimiz pen qos palatamyzdyń ókilderi de «jaılaýǵa» shyǵyp ketedi. Ne kerek, dál qazir qazaq jeri ıen dalada ıesiz qalǵan jalǵyz úı sekildi. Munda qarasha halyq qana qalǵan. Qalǵandarynyń barlyǵy jaılaýǵa shyǵyp ketken. Baıdyń asyn baıǵus qyzǵanyptynyń keri sekildi áser qaldyryp otyrǵan bolarymyn. Biraq men uqqym keletin bir jaı bar. Nege atqa mingen kókeler men kógimizge kótergen juldyzdarymyz demalysyn shetelde ótkergendi qup keredi? Biz olardy sonshalyqty jalyqtyryp jiberdik pe? Jyl boıy mashaqat tartqyzyp, jaz kelgende bizdi kórgisi kelmesteı «jaılaýǵa» taıyp turatyny nesi? Bizdiń dál osy ýaqytta ıesiz qalatynymyzdy jaýlarymyz bile me eken? Sheteldegi jaılaý olarǵa da, bizge de pana bolmasy haq. Odan da osy ýaqytqa deıin sol jaılaýǵa shyǵyndalǵan qazaqstandyq aqshalardyń basyn qurasaq, álgi jaqtaǵylar bizdiń jazǵy qonysqa aǵylar edi ǵoı. Kól deseń kóli, shól deseń shóli bar qazaq jerinen jerip, nege basqa jaılaýǵa kósh bastap ketip qala beresizder, kókeler? Mı qaınaǵan ystyqta ámirken aqshanyń teńgege batyrǵan tisine baıbalam sala almaı biz otyrmyz. Al sizderdiń «jaılaýdaǵy» jaǵdaılaryńyz qalaı, jaqsy ma?
Aınur Tóleý
