Qazan aıynda Qamshy.kz aqparat agenttigi «Dombyra» arnasynyń jetekshisi Qanat Erjigitovpen áńgimelesip, "Nazarbaevtyń dombyra týraly bastamasyn bılik qoldamaı otyr" degen taqyrypta suhbat jarıalady. Arna jetekshisi OTAU TV spýtnık júıesine baıqaýyna qujattaryn jınastyryp qatysqanyn, degenmen "Dombyra" telearnasy qaladaǵy sıfrlik jáne spýtnıktik jelilerge ótpegenin aıtqan bolatyn.  Kóp uzamaı bul másele mınıstr Dáýren Abaevtyń da qulaǵyna jetip, mınıstr arnany qoldaýǵa daıyn ekenin aıtty. 

«Dombyra sekildi mádenıet, bilim salasyndaǵy telearnalardy memleket tarapynan qoldaý bildirýi kerek. Óıtkeni jeke dara kásipkerler mundaı qadamǵa bara bermeıdi. Biz qoldaýymyz kerek. Eger kelesi komısıalyq otyrysta qujattaryn durystap tapsyrsa, komısıa músheleri durys sheshim qabyldap jatsa, qoldaýǵa bolady dep oılaımyn. Bul arna jumysyn istep jatyr. Tek bul arnanyń jetekshisi OTAU TV  spýtnıktik júıesine kirýdi qalap tur. Munda 100-ge jýyq arna bar. Sonyń ishinde 30 arna qarajat tólemeıdi. "Dombyra" telearnasy da sol 30 arnanyń qataryna kirgisi keledi. Biraq muny tek komısıa músheleri sheshedi. Biz qoldaýǵa daıynbyz. «Dombyra» arnasynyń qarjylaı kómek qajet nemese OTAU TV spýtnık júıesine qosyńyzdar degen ótinishin qarastyrýǵa bolady", - dedi Dáýren Abaev.