Ulybrıtanıada kólikti qujatsyz meńgerýge haqyly jalǵyz-aq adam bar. Ol Elızaveta II patshaıym. Ótken jeksenbi kúni patshaıymnyń saıabaq ishindegi kógaldy kólikpen basyp ótip bara jatqanyn erli –zaıyptylar kórip tań qalǵan eken. Bul týraly «Qamshy» portaly vesti.ru. saıtyna silteme jasap otyryp habarlaıdy. Shirkeýden qaıtyp kele jatqan patshaıym saıabaq ishinde jas balasymen qydyryp júrgen jubaılarǵa kedergi jasamaý maqsatynda kógaldy basyp, jastardan aınalyp ótýdi qup kórgen eken. 23 jasar Skarlett Vınsent patshaıymnyń ózderine qol bulǵap ótip bara jatqanyn kórip tańqalǵan. «Biz ózimizdiń kúndelikti taqyrybymyzdy talqylap ketip bara jatqanbyz. Artymyzdan kóliktiń kelip qalǵanyn baıqamappyz da. Kólik bizdi aınalyp ótip, qol bulǵaǵanda tań qaldyq» ,-deıdi Skarlet. Jeksenbi kúni ashyq aspan astynda, saıabaq ishinde alańsyz qydyryp júrgen jas jubaılarǵa bizdiń eldegi jaǵdaıdy aıtsań, tań qalatyn shyǵar. Patshany bylaı ysyryp tastap, myqty bir komnanıanyń tizginin ustaǵandar esik aldynda oınap júrgen balany op-ońaı qaǵyp kete alady. Saıabaqty aıtpaǵanda, jaıaý júrginshilerge arnalǵan arnaıy jolaqtan qyl kópirden ótkendeı, biletin súrelerimizdi aýyzǵa alyp, tilimizdi kálımaǵa keltirip ótetinimiz jasyryn emes qoı. Sebebi júrginshilerge arnalǵan jolaqty jolda sizdi bir dókeıdiń balasy qaǵyp ketse, qunyńyzdy ótep ala almaı qalasyz. Olarǵa zań da, ereje de qaýqarsyz. Negizi adamdy adam zań arqyly emes, adamı qundylyqtar arqyly syılaǵanǵa ne jetsin? Áıtpegende álgi patshaıymnyń múmkindigi men quqyǵy barlyǵynan bıik emes pe? Ol aqsúıektiń urpaǵy. Biraq ol óz azamattaryn syılaıdy. Memlekettiń azamattaryn aqsúıektiń syılaýy bir kúnde qalyptasa salǵan joq. Ol úshin qanshama tarıhı kúrester oryn aldy. Adam- basty qundylyq. Ásirese tym az ult úshin bul buljymas qaǵıdaǵa aınalýy tıis bolatyn. Al bizde barlyǵy kerisinshe. Jol apatynan kóz jumyp jatqan otandastarymyzdyń sany kún ótken saıyn artyp keledi. Qaýipsizdik beldigin taqqaly, beınebaqylaý ornatqaly júrgizýshiler arasyndaǵy tártip jolǵa qoıyldy dep jatamyz. Tártip eń aldymen adamnyń ishki áleminde jolǵa qoıylýy kerek. Aldymen elge úlgi bolatyn azamattar zańdy bel ortasynan kúıretip ketpeı syılaıtyn bolsa, turǵyndardyń da zańǵa degen qurmeti arta túsedi. Shyǵarǵan solqyldaq zańdy ózińe qaraı ıliktirgiń keletinin bilgende, qarashanyń aldynda qadiriń qala ma? Bereke-birlik, aýyzbirshilik pen tatýlyq dep urandaımyz. Ózińniń bir sáttik syıyń joq jerden qaıtip bereke tappaqsyń? Patshaıym jas kezinde júk kóligin aıdap, qoǵamdyq jumystar atqarǵan eken. Ol jeksenbi kúngi áreketi arqyly patshazadalarda qulqyn ǵana emes, qolqanyń da bar ekenin ańǵartyp ótti.Osylaısha bir sáttik sheshimi arqyly taǵy da yqylasqa bólenip jatyr. Onyń sol kúngi áreketin barlyǵy jarysa jazdy. Adamdyq batys pen shyǵysty talǵamaıdy. Keýdede adamnyń júregi soǵyp tursa, ony jer sharynyń barlyq tusynda abyroıymen alyp júrýge tıispiz.
Aınur Tóleý
