Bilim jáne ǵylym mınıstri Asqat Aımaǵambetov Ortalyq komýnıkasıalar qyzmetindegi brıfıńte tehnıkalyq aqaýlarǵa baılanysty onlaın sabaqtar ótilmeıtinin málim etti.

Onyń sózinshe, ınternetpen onlaın oqý yńǵaıly bolǵanymen, bul tetikte kedergiler bar. Bul 1 sáýirde ótken synaq sabaqtar barysynda anyqtalǵan.

– Synaq sabaǵyna tek qana onlaın rejımde 1 mln 250 bala shyǵyp, dáris alyp kórdi. Jalpy osy synaq sabaqqa ártúrli platformada elimiz boıynsha 2,5 mıllıon bala qatysty. Nátıjesinde jaqsy daıyndyqty kórdik. Ustazdarymyz qysqa ýaqyt ishinde qashyqtan oqytý júıesine baǵyttalyp, sheberligin shyńdap daıyndalǵan eken. Barlyq ustazdarǵa alǵys aıtqym keledi. Synaq sabaqtar kezinde basqasha máselelerdi kórdik. Onlaın osynshama qosylýdy kótermeıdi, soǵan baılanysty kóp yńǵaısyzdyqtar boldy. Oǵan kózimiz jetip otyr. Tehnıkalyq aqaýlar jetkilikti. Internet bul júıeni kótere almady. Onlaın oqýdyń ornyna, arnaıy platformalar arqyly qashyqtan oqytýdy júrgizýimiz qajet,  – dedi QR Bilim jáne ǵylym mınıstri Asqat Aımaǵambetov oqýshylardyń İV toqsanda qashyqtan oqý júıesine arnalǵan onlaın konferensıada.

Vedomstvo basshysy elde Bilimland.kz, «Kúndelik», «Daryn onlaın» sıaqty arnaıy platformalar bar ekenin, ár mektep osy platformalardyń birine toqtalyp, jumys isteıtinin aıtty.

Mınıstr qashyqtan oqytýdyń bári onlaın oqytý emes ekenin, qashyqtan oqytýǵa poshta, teledıdar, radıo, tapsyrmalardy ınternet arqyly alyp oqý jatatynyn aıtty. Al onlaın oqytý –  ınternet kómegimen júrgiziletin, ustaz ben oqýshy birin-biri kórip otyratyn oqytý túri.