Qazaqstannyń Ulttyq banki jekelegen salalarda qolma-qol aqshasyz tólemderdi qabyldaý úshin bank komısıasynyń tómendegeni týraly málimdedi.

"Prezıdent Qasym-Jomart Toqaevtyń 2019 jylǵy 2 qyrkúıektegi «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna joldaýynda aıtylǵan qolma-qol aqshasyz tólemderdi damytý jáne bankterdiń komısıalaryn tómendetý sharalaryn qabyldaý týraly tapsyrmany oryndaý sheńberinde Qazaqstan Ulttyq banki bankterdiń tólem kartochkalaryn paıdalana otyryp, tólemderdi qabyldaý úshin alatyn komısıanyń tómendetilgeni týraly habarlaıdy", delingen habarlamada.

Ulttyq banktyń málimetinshe, ózgerister 2020 jyldyń 1 mamyrynan bastap kúshine enedi. Bul mańyzdy áleýmettik máni bar ekonomıkanyń jekelegen salalaryna qatysty: bilim berý, medısınalyq qyzmetter, dárihanalar, turaq oryndary, aqyly joldarǵa aqy tóleý, aýyl sharýashylyǵy qyzmetteri, jyljymaıtyn múlikpen jasalatyn mámileler.

Qazaqstannyń Ulttyq banki osy ózgeristerdi qabyldaý úshin halyqaralyq tólem júıelerimen jáne ekinshi deńgeıdegi banktermen qajetti jumys júrgizdi. Birlesken jumystyń, taldaý men talqylaýlardyń nátıjesi boıynsha jańa segmentter aıqyndaldy, 2020 jylǵy 1 mamyrdan bastap Visa jáne Mastercard halyqaralyq tólem júıeleri bankaralyq komısıanyń mólsherlemesin qazaqstandyq bankter úshin 2 ese - 1%-ǵa deıin, farmasevtıka segmentinde – 1,3%-ǵa deıin tómendetedi.

Saýda komısıasyn tómendetý bastamasyn tólem kartochkalary naryǵynyń negizgi qatysýshylary qoldady. Olardyń qataryna «Qazaqstan Halyq Banki» AQ, «Kaspi Bank» AQ, «Forte Bank» AQ, «Sberbank» AQ EB, «ATFBank» AQ, «Bank SentrKredıt» AQ, «Jysan Bank» AQ, «Eýrazıalyq bank» AQ kirdi. Atalǵan ekinshi deńgeıdegi bankterge ekvaırıńtik qyzmet naryǵynda (tólem kartochkasyn paıdalana otyryp, qolma-qol aqshasyz tólemderdi qabyldaýdy uıymdastyrý boıynsha qyzmet kórsetý) jıyntyǵynda 96% tıesili.

Joǵaryda atalǵan qarjy ınstıtýttary saýda (ekvaırıńtik) komısıasyn ortasha alǵanda 35%-ǵa (2,3% aǵymdaǵy ortasha mánnen tranzaksıa somasynyń 1,5%-y ortasha mánine deıin) tómendetedi. Saýda komısıasyn tómendetý kásipkerler men azamattarǵa banktik komısıa boıynsha óz shyǵystaryn tómendetýge múmkindik beredi. Bankaralyq jáne saýda komısıasyn tómendetý jónindegi birlesken sharalardyń nátıjesi bıznes sýbektileri shyǵystarynyń naqty únemdelýi retinde jylyna 2 mlrd teńge deńgeıinde boljanady.

Jalpy alǵanda, qabyldanǵan sharalar jeke qolma-qol aqshasyz esep aırysýdy odan ári damytý úshin jaǵdaılardy eleýli túrde jaqsartady jáne «kóleńkeli ekonomıkanyń» kólemi qysqarýyna oń áser etedi.