Onyń sózinshe, Aısultannyń qazasy esirtkige áýestigimen baılanysty bolýy múmkin. Óıtkeni onyń densaýlyǵy jaqsy bolǵanymen, esirtki qoldanǵannan keıin aýyr depressıaǵa túsetin.
– Ol dem jetpeıtinin aıtatyn. Kardıologtar júrek talmasynyń belgilerin anyqtaıtyn shyǵar. Onyń densaýlyǵyndaǵy kinárát esirtkimen baılanysty boldy. Biraq Aıs meniń úıimde turǵanda esirtkige múldem jolamaıtyn. Sońǵy ret ol meniń úıimde byltyr kóktemde me, álde jaz basynda ma turdy. Menikine kelgende ol esirtki qoldanǵannan keıingi depressıanyń aýyr túrinde edi. Durys sóıleı almaıtyn. Arada apta ótken soń ǵana esin jıǵan, – dedi Musaev.
UQK eks-tóraǵasynyń sózinshe, Aısultan basyndaǵy problemalarǵa aınalasyndaǵylardyń bárin kinálaıtyn.
General sondaı-aq Londonda onyń sońynan ańdyǵanyn, alaıda óltirilgeni týraly qolynda derek bolmaǵandyqtan, dóp basyp aıta almaıtynyn jetkizdi.
Musaev Aısultan Londonda qaǵaz júzinde qazirgi KAZ Minerals, burynǵy Qazaqmys korporasıasynda menedjer retinde istegenin, alaıda ony ol jaqqa kirgizbeıtinin habarlady.
• Aısultan Rahattyń sońǵy jazbasy
– Ol jumysqa barǵysy keletinin, biraq ony kirgizbeıtinin maǵan talaı aıtqan. Mundaı nusqaýdy Nazarbaev bergen bolýy múmkin. Onyń ústine Vladımır Kım de Aısultandy jaqtyrmaıtyn. Nazarbaevqa únemi jamandap júretin. Aısultan Londonda negizinen esirtki men jeńil júristi qyzdarǵa áýes boldy, – dedi ol.
Musaev Aısultan qańtarda daýly málimdemelerin esirtkiniń býymen jasaǵanyn, artynan esin jıǵanda sol áreketi úshin qatty ókingenin málimdedi. Onyń sózinshe, bul áreket Aısultandy psıhologıalyq turǵyda "jep qoıǵan". Keıingi jazǵandaryn qańtardaǵy aqymaqtyǵyn jýyp-shaıý úshin jarıalaǵan.
Eks-tóraǵa facebook-te jarıalaǵan DNK test nátıjesi jalǵan bolǵanyn, ony Aısultandy Nazarbaevtyń ósh alýynan qorǵaý ári Darıǵa Nazarbaevany aqtap, qoldaý úshin jasaǵanyn jetkizdi.
– Endi ol joq kezde shyndyqty aıtýǵa bolady. Shyn máninde ol Rahattyń bıologıalyq uly emes. Bar biletinim osy, – dedi ol.
Pikir qaldyrý