«Nur Otan»-nyń partıaishilik saılaýynda onlaın-daýys berýge qatysý úshin «Praımerız» aqparattyq júıesine 700 myńǵa jýyq partıa múshesi tirkeldi.

Partıa baspasóz qyzmetiniń málimetinshe, «Nur Otan» praımerızine 11 myńǵa jýyq úmitker qatysýda. Elimiz boıynsha orta eseppen bir orynǵa tórt adam úmitker bolyp otyr. Kandıdattardyń 70%-y ózin-ózi usynǵandar, al myńǵa jýyǵy – partıanyń jańa músheleri. 37%-y – áıelder, 29%-y – 35 jasqa deıingi jastar. Qatysýshylardyń ortasha jasy – 43 jas.

7 qyrkúıekten bastap praımerızge qatysýshylar 800 myńnan astam adamdy tikeleı qamtı otyryp, 32 myńnan asa úgit-nasıhat is-sharasyn ótkizdi. 14 qyrkúıekten bastap onlaın-formatta jarıa pikirsaıystar bastalady. Onda qatysýshylar naqty eldi mekenderdiń túıindi máselelerin sheshý jónindegi óz paıymdaryn ortaǵa saldy.

«Elbasy, Partıa Lıderi Nursultan Nazarbaev elimizdegi azamattardy alańdatqan máselelerdi birlesip sheshý úshin ashyq dıalogty qamtamasyz etýdiń mańyzdylyǵyn atap ótti. Halyqpen keńinen talqylaý maqsatynda «Nur Otan» partıasy árbir óńir, qala jáne aýdan boıynsha 216 saılaýaldy baǵdarlamanyń jobalaryn jarıalady. Olardy el Prezıdenti Qasym-Jomart Toqaevtyń Qazaqstan halqyna Joldaýynda qoıylǵan mindetterdi, sondaı-aq, «Halyq únine qulaq asatyn memleket» tujyrymdamasy aıasynda azamattardyń usynystaryn eskere otyryp pysyqtaıdy. Birneshe kúnniń ishinde praımerızge qatysýshylar 8 myńnan asa talap-tilekter men usynys jınady», - delingen partıanyń baspasóz qyzmeti jarıalaǵan beınerolıkte.
Eske sala keteıik, «Nur Otan» praımerıziniń basty maqsaty – aldaǵy Májilis pen barlyq deńgeıdegi máslıhattar saılaýyna partıalyq tizimderge engizý úshin qoǵamnyń senimi men qoldaýyna ıe bolǵan bedeldi partıa kóshbasshylaryn anyqtaý.

Sondaı-aq, partıa elektrondyq daýys berýdi uıymdastyrý úshin mobıldi qosymsha men primaries.kz veb-portalynyń múmkindikterin paıdalanýdy josparlap otyr. Ashyqtyqty qamtamasyz etý úshin «bir daýys, bir JSN, bir mobıldi nómir jáne bir IP-adres» qaǵıdaty boıynsha rastaý (verıfıkasıa) júıesi qoldanyldy.

Kandıdattardyń reıtıńisi bar praımerızdiń qorytyndysy 5 qazanda jarıalanady.