Almaty turǵyndarynyń qala ómirine, onyń damýy men kórkeıýine tikeleı aralasýǵa jol ashqan "Búdjetke qatysý" jobasynyń ekinshi kezeńine ótinim berý bastaldy. Jobanyń ekinshi kezeńi aıasynda 28 tamyz ben 5 qazan aralyǵynda qala boıynsha 428 jobalyq usynys kelip túsken. Sonyń birshamasy Naýryzbaı aýdanyna tıesili.

Naýryzbaı aýdanynda jobanyń alǵashqy kezeńinde turǵyndar tarapynan 32 usynys túsip, onyń 7-eýi qabyldanyp, júzege asyp úlgerdi. Atap aıtqanda, Áshimov kóshesi-13 úı aýlasynda basketbol alańyn salý, Nurmuhamedov kóshesindegi saıabaqty jóndeý, vorkaýt jáne basketbol alańyn qurý, Abaı saıajaıynda, Dosmuhamedov kóshesinde vorkaýt alańdaryn salý, Aqtamberdi jyraý, Keńesbaev kóshelerinde balalar alańy men skeıt, vorkaýt alańdaryn qoıý sekildi jobalar usynylyp, atalǵan usynystar búginde aýdan turǵyndarynyń ıgiligine qyzmet etip jatyr.

Mundaı oń bastama munymen toqtap qalmaı, keler jyly da jalǵasyn tappaq.

Osyǵan baılanysty Naýryzbaı aýdanynyń ákimdigi turǵyndardan "Búdjetke qatysý" baǵdarlamasyna belsendi qatysyp, jobalardy budget.open-almaty.kz saıtyna usynýǵa shaqyrady.

Ekinshi kezeń sharttaryna sáıkes jobalyq usynystar 20 qazanǵa deıin qabyldanady.