Qazaqstanda "MG production plus" kınokompanıasy usynǵan "Uly dala zary" fılminiń onlaın premerasy ótti. 

1920-1930 jyldarda Qazaqstandaǵy jergilikti turǵyndarynyń 70%-dan astamy ashtyqtan kóz jumdy. 1,5 mıllıon adam Otanyn tastap, basqa elderge qashýǵa májbúr boldy. Osylaısha 10 jyldyq ashtyq kezeńinde 47 mıllıonnan astam keńes úkimetiniń adamy zardap shekti. "Uly dala zary" – osyndaı naqty tarıhı oqıǵalarǵa negizdelgen fılm. 

Fılmniń shekteýli onlaın kórsetilimi 2020 jyldyń qazan aıynda Qazaqstanda www.cinexus.kz onlaın kınoteatrynda bastaldy. Al álemdik premera Azıa dúnıejúzilik kınofestıvaliniń onlaın baǵdarlamasy aıasynda 2020 jyldyń 7 men 9 qarashasy aralyǵynda Los-Andjeleste ótti. Onda fılmdi 16 mıllıonnan astam kórermen 3 kún boıy tamashalaǵan.

"Uly dala zary" halyqaralyq  "Altyn Globýs" premıasyna "Shet tilindegi úzdik fılm" atalymy boıynsha usynylǵan. 

Atalmysh fılm taqyryptyń mańyzdylyǵyna qaramastan, memleketten qoldaý tappaǵan. Sondyqtan kıno óndirisine aqsha jetpeı, túsirilim 5 jylǵa sozylǵan. Fılmniń prodúseri Ernar Malıkov asharshylyq qurbandaryn eske alý úshin táýekelge baryp, barlyq derlik múlkin satyp, osy fılmdi túsirgen. Prodúserdiń osylaısha týynda ashtyqtan qaıtys bolǵan jáne jazyqsyz japa shekkenderdiń barlyǵyna máńgilik estelik qalsa eken deıdi.

Avtorlar fılmde ultaralyq arazdyqty qozdyratyn eshteńe joq ekenin, tek qazaq halqynyń bastan keshken qasireti, Keńes Odaǵynyń barlyq halyqtarynyń shekken zardaby kórsetilgenin atap ótti.

Fılmde "Mahabbat, qyzyq mol jyldar", "Arýaqqa ańshylyq", "999" sıaqty tanymal fılmder men televızıalyq jobalar arqyly belgili Marına Kýnarova rejıserlik etip, senarıin jazǵan.

Asharshylyq týraly fılm túsirý ıdeıasyn prodúser men rejıser bes jyldan astam ýaqyt buryn kótergen. Uzaq ýaqyt boıy arhıvtik materıaldardy izdep, sol jyldardaǵy jazbalar men ádebıetterdi zerttegen. Senarı birneshe ret qaıta jazylǵan.

– Fılmniń maqsaty – uzaq jyldar boıy únsiz bolǵan qazaq halqynyń ótkeni týraly áńgimeleý. Qazaq halqy ult genosıdinen aman qaldy, bul taqyryp ondaǵan jyldar boıy basyp-janshylyp otyrdy. Al bul kartına búkil álemge tarıhı shyndyqty ashty, – dedi rejıser Marına Kýnarova.

Kórermen atalmysh fılmdi www.cinexus.kz. onlaın kınoteatrynan tamashalaı alady.