Elordada "Nur Otan" qalalyq fılıalynyń konferensıasynda máslıhatqa partıalyq tizim qalyptastyrylyp, Parlament Májilisiniń partıalyq tizimine kandıdattar anyqtaldy. Sondaı-aq, qalalyq saılaýaldy baǵdarlamasy bekitilip, partıanyń XX sezine qatysý úshin delegattar saılandy, dep habarlaıdy "Nur Otan" Ortalyq apparatynyń baspasóz qyzmeti.

Sonymen, eń joǵary reıtıńke ıe praımerızge qatysýshylar qatarynan jáne fılıal kvotasyn eskere otyryp, qala máslıhatyna 1 orynǵa 2 adam qaǵıdaty boıynsha 62 kandıdattan turatyn partıalyq tizim qalyptastyryldy.

Taldaý kórsetkendeı, tizimdegi áıelderdiń úlesi 20-dan 30% ǵa deıin, al 35 jasqa deıingi jastar 0-den 22,5%-ǵa deıin ósti. Úmitkerlerdiń ortasha jasy 9 jasqa – 52 jastan 43 jasqa deıin jasardy. Qyzmettegi 25 depýtattyń 5-i ǵana jańa partıalyq tizimge endi. Jalpy, máslıhattaǵy elordalyq "Nur Otan" partıasynyń tizimi 90 paıyzǵa jańartyldy.

Tizimde SHOB ókilderiniń úlesi basym – 32,2%, bilim berý salasy – 20,9%, densaýlyq saqtaý salasy – 11,4% jáne t.b. bar. Partıalyq tolyq tizimdi primaries.kz. saıtynan kóre alasyzdar.

Konferensıa barysynda májiliske partıalyq tizimge úmitkerler arasynda pikirsaıys ótti. Birinshi raýndta qatysýshylar ózderiniń saılaýaldy baǵdarlamalarynyń negizgi tezısterin tanystyrdy, ekinshi raýndta "suraq-jaýap" túrindegi pikirtalas sesıasy ótti.

10 úmitkerdiń ishinen partıa músheleri "Praımerız" aqparattyq júıesi arqyly qalalyq ókildik kvotasyna sáıkes 5 kandıdatty tańdady.

Balalar aýrýhanasynyń meńgerýshisi Larısa Pavloves, "Atameken" UKP ókili Almaz Júnisov, "Halyqaralyq jahandyq áıelder kóshbasshylyǵy" qoǵamdyq birlestiginiń jetekshisi Baltaeva Hanzada, Sybaılas jemqorlyqqa qarsy is-qımyl agenttiginiń qyzmetkeri Rasýl Medetov jáne bıznes ókili Baýyrjan Isabaev eń kóp daýys jınady.

Fılıal tóraǵasy Altaı Kólginov atap ótkendeı, qalanyń saılaýaldy baǵdarlamasy azamattarǵa jaıly turmys jaǵdaılaryn qamtamasyz etýge baǵyttalǵan naqty maqsatty ındıkatorlarǵa negizdelgen.

– "Halyq únine qulaq asatyn memleket" tujyrymdamasy – turǵyndar men bılik arasyndaǵy turaqty dıalog. Bizdiń mindetimiz – azamattardyń máselelerin estip jáne kórip qana qoımaı, eń bastysy olarǵa durys jáne jedel jaýap berý. Sondyqtan qalalyq saılaýaldy baǵdarlama praımerız kezinde turǵyndardan túsken usynystardy eskere otyryp, pysyqtaldy, – dedi Altaı Kólginov.

Eske sala keteıik, buǵan deıin "Nur Otan" partıasy óńirlik fılıaldardyń konferensıa kestesin jarıalaǵan bolatyn, onyń barysynda barlyq deńgeıdegi máslıhattarǵa partıalyq tizimder jáne ár óńirden májiliske partıalyq tizimge kandıdattar anyqtalatyn bolady.

Keshe Shymkent jáne Almaty qalalarynda konferensıa ótti. Almaty, Qaraǵandy jáne Qyzylorda oblystarynda 16 qarashada ótedi. Aqmola, Shyǵys Qazaqstan, Jambyl, Batys Qazaqstan, Túrkistan, Atyraý, Qostanaı, Mańǵystaý, Pavlodar jáne Soltústik Qazaqstan oblystarynda – 17 qarashada ótedi.

Qalalyq jáne aımaqtyq konferensıalarda kandıdattar arasyndaǵy pikirsaıys praımerızdiń ekinshi deńgeıi aıasynda ótkiziledi.

Partıaishilik irikteýdiń birinshi kezeńine 10 myń kandıdat qatysty. Onyń 37%-y – áıelder, 29%-y – 35 jasqa deıingi jastar. Bastaýysh partıa uıymdarynan kandıdattardyń 30%-y usynylsa, 70%-y – ózin-ózi usynýshylar. Úmitkerlerdiń ortasha jasy – 43 jas. Bul rette daýys berýge 662 myńnan astam partıalyq qatysty.