Búgin saıasatker, opozısıalyq "Dat" gazetiniń jetekshisi Ermurat Bapıdiń ustalyp, Almatydaǵy Medeý aýdandyq polısıa bólimine jetkizilgeni habarlanǵan. Jýrnalıs polısıa bóliminen shyqqannan keıin ózine azamattyq belsendi Dýlat Aǵadildiń uly Janbolat Aǵadildiń onlaın-janazasyna qatysqany úshin aıyp taǵylyp, is qozǵalyp jatqanyn facebook paraqshasynda málim etti. Tómende jýrnalıs jazbasynyń tolyq mátini usynylyp otyr.
"Polısıa ne sebeppen ustady?" degen frendostardyń suraǵyna endi ǵana jaýap berýge mursha bolyp jatyr. 23 jylǵy opozısıalyq oıranda júıke juqarǵan, al nerviniń negizinde oıanyp ketetin hronı-syrqattar bolady. Sonyń biri syr berip, jelige jete almaı jatyr edim...
Onyń ústine, mundaı "usaq-túıekten" jarnama jasap qalatyn jasań jáne jańa belsendiniń jelpildegen zamanynan baıaǵyda-a-a ótip ketkenbiz. "Aqyr shyqqan órt eken, bas-sıraq úıtip ala qoıaıyn" deıtin emes... Úsh ret qylmystyq, onǵa jýyq azamattyq, sany sanada qalmaǵan ákimshilik sottan ótken soń, oıbaılaýdyń ózi uıat.
Biraq bul jolǵy polısıalyq-KNBlyq ustaýdyń hıkaıasy qyzyq boldy. Baýyrymnyń úıiniń aldyna kóligimdi tejegenim sol edi, sońymnan salyp uryp úsh polısaı men bir "knbshy" kisapat jetip keldi. Mingenderi jeke menshik nómirli mashına. Áı-sháı joq: "Sizge qatysty is qozǵaldy, bizben birge Medeý aýdandyq polısıasyna barasyz!" deıdi.
"Nege baram? Ol qandaı is?".
"Barǵan soń bilesiz...".
"Povestka qaıda?!".
"Barǵan soń alasyz...".
"İs qozǵalǵany týraly qaýly qaıda?"
"Barǵan soń beredi...".
"Kim beredi?!".
"Tergeýshi...".
"Qolyma shaqyrtý berilmeı, eshqaıda barmaımyn!".
Sóıtkenim sol eken, aq kúrteli (sýrette) "KNBshy" bilegimnen tas qyp qysyp, súırep ala jónelmek. "Patrúldi shaqyr!" dep, qojaıyndyq qalyppen polısıanyń úsheýine komanda berip qoıady. Ondaǵysy - meni qorqytqan túri. Patrúlsiz-aq tórteýi súıreı jónelse, qarsylyq qylar qaılam qaısy?!
"Patrúldi shaqyr" degeni - qara halyqty qorqytýdyń amalyna ábden mashyqtanǵan mańqanyń qylyǵy. Aýmaǵan súmelek!
Aıtpaqshy, buryndary "KNB"-ǵa adamı jáne analıtıkalyq aqyly bar adamdy alýshy edi. Búgingi jemqorlyq-sybaılastyq júıe óńsheń topas-týpoıdy jınaıtyn bopty. Para berseń - ala beredi! Mynaý "KNBshy" sol topastyqtyń tolyq etalony eken. Qylmystyq Kodeksiniń 318-2 babymen - "QR prezıdentiniń ar-ojdanyna nuqsan keltirgeni úshin" bir sottalyp (2002j), "SolDAT" gazetinde "Qazaqgeıt" (N.Nazarbaevtyń urlyǵy) skandaly úshin eki sottalǵan (2002j), "avtorıtetnyı vor" atanýǵa attam qalǵan adamdy "na pýshký" qorqytam dep oılaǵan eken! KNB bolmaq túgili, Karım Masımovtyń ózi bop ketse de, ondaı mandamǵa moıynsunatyn men be?!
Aqyry ne kerek, joǵarynyń jarlyǵyn oryndaǵan paryqsyz polısaılarǵa dyryldatyp súıretpes úshin, Medeý PB-syna ózim bardym. Árıne topas "kontorshy" bastaǵan polısıa qaraýyly meni baǵyp keldi.
Basqarmada bir túbitmurt túsinik jaz deıdi.
"Ne úshin, ne dep?".
"Keshegi ruqsat etilmegen mıtıńige qatysqanyńyz úshin...".
"Ruqsat berý-bermeý týrasyndaǵy bap "toqaevtyq popravkada" joq ekenin bilesiń be?!".
"Bilmeımin... maǵan osylaı jazdyr dedi...".
"Kim ol, qaı aqymaq ruqsat etilmegen mıtıńige qatysty dep júrgen? Mıtıńke "ývedomıtelnyı" kelisim ǵana kerek degen Toqaev qol qoıǵan zańǵa qarsy shyǵyp júrgen qaı jarymes?!".
"Baıqap sóıleńiz!..".
"Sizge tapsyrma bergen, Memlekettiń zańyn bilmeıtin bastyǵyńdy jarymes demegende, kim deımiz?!".
Osyndaı tájikeden keıin, men óz nusqamda túsinik jazyp berdim. Túsinik tektes ol jazbanyń mazmuny qala ákiminiń atyna berilgen habarlamada kórsetilgen (fotokóshirmeni qarańyz).
Qysqasy, bizdiń bir top belsendi azamat hám ımandy musylman Dýlat Aǵadildiń jumbaq jaǵdaıda qaza bolǵan uly - Janbolattyń qasıetti jumada astanada ótken janaza-duǵasyna Almatyda onlaın qol jaıýǵa jınalǵan edik. Mine, masımovtyq masterler men "kitaphanalyq" kiriptarlar sol ıslamı rásimdi "ruqsat etilmegen mıtıńi" degen mánis shyǵarypty. Men sol "ruqsatsyz" jıynǵa qatysyppyn (?). Sonda deımin-aý, onlaın-janazaǵa jınalǵan elý shaqty musylman balasynyń arasynda Qudabaı Qarjaý baýyrym ekeýimizdi "erek elep-eskergenderi" qalaı?
Aıtpaqshy, eshqandaı tergeý de bolmady, tergeýshini kórmedim. Men jazǵan túsiniktemeni tigip, kapıtany bar, leıtenanty bar bir top polısaı ózderi protokol qattap, bıttiń qabyǵyndaı is daıyndap qoıdy. Dúısenbidegi sotta qara jippen kóktelgen sol is qaralady.
Al sot jaryqtyq meniń onlaın oı-pikirimdi tyńdaı ma, Janbolattyń janazasyn mıtıńige balaı ma - ol jaǵy sýdıanyń saýdasyndaǵy syńaı bolady. Álbette, "kitaphana" men KNB-nyń tapsyrmasymen táptishtelgen iste sot notarıýstyq nusqadaǵy qyzmetten asyp kete almaıtyn edi, bu joly bul "bulbul" nedeı úkimdi úndeıdi - ol da zańnan buryn, ar-uıattyń baǵamyna saı sharýa bolsa kerek...
Bizdiki ne kórmegen bas: taǵy bireýin taǵdyrdyń salǵanyna, nazarbaevtyq rejımniń naısaptyǵyna neǵylamyz-daǵy... Bastysy - bas aman bolsyn, qalǵanyn keıin kelistirip kórermiz...
Rahmet, aǵaıyn!
Pikir qaldyrý