Qazaqstan prezıdenti úkimet múshelerimen, birqatar organ basshylarymen, qalalar men oblystardyń ákimderimen vıdeokonferensıa rejıminde keńes ótkizdi, dep habarlady Aqorda saıty.

Qasym-Jomart Toqaev pandemıa kezinde otandyq dárigerlerdiń tıisti tájirıbe jınaǵanyn, bul derttiń negizgi belgilerin aıqyndap, onymen kúresý joldaryn úırengenin atap ótti. 

– Pandemıanyń ekinshi tolqyny kóptegen belgileri boıynsha ózgeshe bolmaq jáne el ekonomıkasy úshin kúrdeli kezeńde ótpek. Biz muny eskerýimiz kerek. Búginde búkil álem "kovıd teńdeýi" dep atalatyn kúrdeli máseleni sheshýdiń aldynda tur. Mundaı jaǵdaıda tutas bir salanyń joıylyp ketýi ǵana emes, onyń keıin bilinetin saldary da ońaı tımeıdi. Jumyssyzdyq órship, bilim berý isindegi olqylyqtardyń kesiri túrli teris pıǵyldardyń asqynýyna, onyń ishinde, qylmystyń órshýine ákep soqtyrýy múmkin. Sondyqtan qazirgi mindet – kóktemdegideı jappaı karantınge jetkizbeı, pandemıany aýyzdyqtaý, – dedi prezıdent.

Prezıdent sondaı-aq indet juqtyrǵandardyń barynsha naqty esebin alý vırýspen kúrestiń basty talaby ekenin aıtty. 

– Birqatar oblystarda koronavırýs indetine qatysty jańa jaǵdaılardy jasyrý derekteri anyqtaldy. Áńgime Shyǵys Qazaqstan, Soltústik Qazaqstan, Pavlodar,  Aqmola, Qostanaı jáne basqa da oblystar jaıynda bolyp otyr. Ótirikti shyndaı sóıletý asa qaýipti qubylys ekenin túsiný kerek. Óıtkeni ol shynaıy qaýiptiń betin búrkemeleıdi. Sondaı-aq búkil elimiz boıynsha koronavırýs indetine qarsy júrgizilip jatqan kúres strategıasyna zıanyn tıgizedi. Qazirgi ahýal jiti baǵalanbaı, qabyldanǵan sharalar tolyq júzege asyrylmaı otyr. Halyqtyń indetten saqtaný deńgeıi tómendep ketken. Bul – aksıoma. Mundaı jaǵdaı álemniń kóptegen elinde baıqalýda. Atalǵan problemanyń bizdiń densaýlyq saqtaý júıemizde de sozylmaly sıpat alǵanyn moıyndaýymyz kerek, – dedi Qasym-Jomart Toqaev.