QR Premer-Mınıstri Asqar Mamınniń tóraǵalyǵymen ótken Úkimet otyrysynda memlekettik qyzmet kórsetý prosesin jetildirý máseleleri qaraldy, dep habarlaıdy Qamshy.kz aqparat agenttigi QR Premer-Mınıstriniń Baspasóz qyzmetine silteme jasap.

Sıfrlyq damý, ınovasıalar jáne aeroǵarysh ónerkásibi mınıstri B. Mýsın, eńbek jáne halyqty áleýmettik qorǵaý mınıstri B. Nurymbetov, Nur-Sultan qalasynyń ákimi A. Kólginov, Atyraý oblysynyń ákimi M. Dosmuhambetov, Almaty oblysynyń ákimi A. Batalov baıandama jasady.

Qazirgi epıdemıologıalyq ahýal jaǵdaıynda SDIAÓM bıznes prosesterdi ońtaılandyrý jáne avtomattandyrý boıynsha jumys júrgizdi, HQKO jumysynyń formaty ózgertildi, artyq qujattar talaptary alynyp tastaldy. Tıimdi sharalardyń biri Blockchain tehnologıasyn engizý boldy, bul memlekettik qyzmetterdi kórsetý ýaqytyn edáýir qysqartady jáne derekterdi úshinshi tulǵalarǵa berý múmkindigin boldyrmaıdy.

QR Memlekettik qyzmetter tiziliminde 698 memlekettik qyzmet túri qarastyrylǵan, olardyń 85,5%-y onlaın-rejımde kórsetiledi. Osy jyldyń sońyna deıin bul kórsetkish 90%-ǵa deıin jetkiziledi.

Bıyl eGov paıdalanýshyny bıometrıalyq sáıkestendirý jolymen bir qadamda jeńildetilgen tirkeý mehanızmin engizedi. Osylaısha, eGov-ta uıaly telefondy betke jaqyndatý arqyly tirkelýge bolady, al bıometrıalyq sáıkestendirý qosymsha suraqtar qoıý arqyly paıdalanýshyny ózi anyqtap, tirkeıdi. Azamattardyń avtomobılderdi tirkeý úshin mamandandyrylǵan HQKO-larǵa barýynyń balamasy banktik qosymshalar arqyly satyp alý-satýdy resimdeý bolady, bul qyzmet kórsetý ýaqytyn 10 mınýtqa deıin qysqartady (qujattar úıge jetkiziledi).

Bıylǵy jyldyń sońyna deıin elektrondyq formattaǵy áleýmettik-eńbek salasyndaǵy memlekettik qyzmetter kórsetkishi  90%-ǵa deıin jetkiziledi.

Qoǵamdyq monıtorıń qorytyndysy boıynsha elektrondyq memlekettik qyzmetterdi engizý boıynsha aldaǵy óńirler – Aqmola, Qyzylorda, Qaraǵandy, Qostanaı jáne Batys Qazaqstan oblystary. Bul jumys Almaty oblysy men Shymkentte tıisti deńgeıde júrgizilip jatqan joq.

Úkimet basshysy jergilikti atqarýshy organdarǵa memlekettik qyzmetter kórsetý sapasyna qanaǵattaný deńgeıin keminde 80%-ǵa jetkizýdi, sondaı-aq TKSH qyzmetteri boıynsha astanalyq IQala jobasy úlgisimen tıimdi sheshimder engizýdi tapsyrdy.

Sıfrlyq damý mınıstrligine múddeli memlekettik organdarmen birlesip, barlyq áleýmettik mańyzdy memlekettik qyzmetterdi eGov mobile-ǵa aýystyrý josparyn bekitý tapsyryldy.

«Halyqqa jumystyń naqty nátıjeleri qajet. 2021 jyly "qaǵaz" anyqtamalardyń qajettiligin tolyǵymen joıyp, "Azamattarǵa arnalǵan úkimet" korporasıasynan qyzmetterdi jetkizýdi qamtamasyz etip, barlyq onlaın qyzmetter men servısterdiń qoljetimdiligin 100%-ǵa deıin arttyrýymyz kerek», — dedi A. Mamın.

Densaýlyq saqtaý mınıstrligine azamattarǵa qajetti elektrondyq medısınalyq málimetterdi berýdi qamtamasyz etý, Eńbek mınıstrligine memlekettik organdarmen birlesip, zeınetaqy men járdemaqylardy berýdi taǵaıyndaý prosesterin sıfrlandyrý úshin qajetti derekterdi tolyq sıfrlandyrý men jańartýdy qamtamasyz etý tapsyryldy.  

Premer-Mınıstr ortalyq jáne jergilikti atqarýshy organdarǵa barlyq aqparattyq júıelerdiń tıimdi ıntegrasıalanýyn jáne úzdiksiz jumys isteýin qamtamasyz etýdi, olardyń jumys sapasyn jáne halyq úshin paıdalanýǵa jeńildigin arttyrý boıynsha sharalar qabyldaýdy tapsyrdy.

Úkimet basshysy memlekettik qyzmetterdi sıfrlandyrý salasyndaǵy jańalyqtar boıynsha túsindirý jumystaryn júrgizý qajettigine erekshe nazar aýdardy.