"Memleket balalarǵa "járdemaqy" dep qaıyr-sadaqa bermeı, "Ana men bala" kapıtaly qoryn qursyn". Tanymal telejúrgizýshi Sáýle Ábildahanqyzy óziniń Facebook paraqshasynda osyndaı bastama kóterdi.

– Eki jyl buryn úkimet kópbalaly analarǵa AÁK taǵaıyndaǵanda, "bul kómekten bas tartyńyzdar!.. Járdemaqy emes, árbir balaǵa kámelettik jasqa deıin jeke kapıtal shotyn ashsyn!.." dep edim... Biraq Sizder "ASP" dep, ózderińizdiń kim ekenderińizdi, balalaryńyzǵa rýh beretin, namysty urpaq ósiretin ana retinde óz rolderińizdi umyttyńyzdar, – dep bastady jýrnalıs jazbasyn. 

Analardy AÁK pen ASP-dan bas tartýǵa shaqyrǵan jýrnalıs memlekettiń balalarǵa "járdemaqy" bergeninen buryn, "Ana men bala" kapıtaly qoryn qurǵany mańyzdy ekenin atap ótti. Ár balaǵa ózine ǵana tıesili jeke shot ashýy kerek ekenin jáne ol aqsha tek balanyń qajetine ǵana jumsalýy kerektigin atap ótti. Sebebi mektepten oqýshyǵa beriletin kıim-keshekterdi alýǵa balalardyń namystanatynyn, dostarynyń aldynda uıalatynyn mysalǵa keltirdi. 

– Jıen sińilim – kópbalaly ana. Úsh balasy mektep jasynda. 7-synyptaǵy qyzyna mektepte kıim-keshek bergen eken. "Apaı, biz kedeı emespiz, kerek emes" dep almaı qoıypty. Anasyna "mama, dostarymnyń kózinshe qaıyrshyǵa uqsap solar bergen kıimdi alam ba, pozor ǵoı!.. Kerek emes, siz de almańyz" dep, namystan jarylyp keterdeı býlyǵyp tur deıdi... Úkimet keıingi urpaqty arly, namysty, uıatty ǵyp ósirýdiń joldaryn emes, osyndaı ártúrli deńgeıde, ıtke súıek laqtyrǵandaı ǵyp qaıyr-sadaqa taratý arqyly balalardyń rýhyn óltirip, namyssyzdyq, alaqan jaıǵyshtyq psıhologıasyn qalyptastyryp otyr, – dep jazdy S.Ábildahanqyzy.