Almaty qalasynyń ákimi Baqytjan Saǵyntaev qalyptasqan sanıtarlyq-epıdemıologıalyq ahýal jáne pandemıanyń yqtımal jańa tolqynyna daıyndyq týraly aıtty. Onyń sózinshe, Almaty KVI aýhalynyń nasharlaýyna daıyn. Bul týraly Almaty qalasy ákimdiginiń baspasóz qyzmeti habarlady. 

Almatyda 18 qarashadaǵy ahýaly boıynsha qalada koronavırýs ınfeksıanyń 15 325 oqıǵasy tirkeldi, onyń 9251-i sımptomdy, 6074-i sımptomsyz. Anyqtalmaǵan pnevmonıa – 1099 oqıǵa. 100 adamǵa shaqqandaǵy kórsetkish – 767, 58. Táýlik ishinde KVI-diń 35 oqıǵasy tirkelgen, onyń ishinde 22 oqıǵa sımptomdy, 13 sımptomsyz, anyqtalmaǵan pnevmonıanyń 4 oqıǵasy tirkeldi.

Almaty ákimi B. Saǵyntaev naýqastardyń 30%-ǵa jýyǵynyń aǵa býyn ókilderi ekenine alańdaýshylyq bildirdi. Atap aıtqanda, KVI juqtyrǵan naýqastar arasynda 40-59 jastaǵylar – 28 (32%) adam, 60 jas pen odan joǵary jastaǵylar – 240 (27%) adam. Osyǵan oraı, B. Saǵyntaev qala turǵyndaryn egde jastaǵy jaqyndaryna janashyrlyq tanytýǵa shaqyrdy. 

– Jastar sanıtarlyq-epıdemıologıalyq qaýipsizdik sharalaryn saqtamaı, adamdar kóp shoǵyrlanǵan jerlerge baryp, vırýsty úıge ákeledi, ata-analary men týystaryna juqtyrady. Sondyqtan men barlyǵynyń qyraǵylyq pen saqtyq tanytýlaryn suraımyn, – dep atap ótti B.Saǵyntaev.

1 qazannan 16 qarasha aralyǵynda KVI ınfeksıasynyń juqtyrý oqıǵasynyń 53%-y qoǵamdyq oryndarda bolǵandyǵy anyqtaldy, olar: saýda jáne oıyn-saýyq ortalyqtary, dúkender, bazarlar jáne qoǵamdyq kólikter.

Ákimniń aıtýynsha, Almaty qalasynyń turǵyndary men qala qonaqtary sanıtarlyq-epıdemıologıalyq qaýipsizdik sharalaryn qatań saqtaýǵa tıis.

B. Saǵyntaev KVI pandemıasynyń yqtımal ekinshi tolqynyna daıyndyq týraly aıta kelip, Almatyda kovıdtik gospıtálderde rezervtik oryndardyń qurylǵanyn eske saldy. Qýattylyǵy 7226 tósek-oryn bolatyn 32 kovıdtik stasıonar ázirlendi, onyń 250-i jansaqtaý oryndary.  Sońǵy aılar ishinde eki jańa emhana salyndy – 500 tósek-oryndy ınfeksıalyq gospıtál; 300 tósek-oryndy jańa modýldi stasıonar.