Qasym-Jomart Toqaev "ArselorMıttal Temirtaý" AQ metalýrgıa kombınatyndaǵy myryshpen jáne alúmınımen qaptaý sehynyń jumysymen tanysty. Bul týraly akorda.kz habarlady. 

Seh myryshpen qaptalǵan oramdy jáne tabaqsha ónimderin óndiredi. Onyń jalpy óndiristik qýaty jylyna 700 myń tonna ónim shyǵarýǵa jetedi.

– Bul qazaqstandyq metalýrgıadaǵy kóshbasshy kásiporyn. Munda Qazaqstannyń tuńǵysh prezıdenti Nursultan Ábishuly Nazarbaev óziniń eńbek jolyn bastaǵan. Biz óndiris qýatyn arttyrýdy maqsat etip otyrmyz. Maǵan jańa ınvestısıalyq jobalar, óndiristi jańǵyrtý, áleýmettik jaǵdaıdy jaqsartý jaıynda baıandady. Kásiporynnyń aldynda turǵan mindetter az emes. Sondyqtan ony retine qaraı sheshý kerek. Ol jaıynda buǵan deıin premer-mınıstrmen sóılestim. Jańa oblys ákimimen de birqatar máseleni talqyladyq. Barlyq máseleni aqyryndap sheshý qajet, – dedi Toqaev.

"ArselorMıttal Temirtaý" AQ bas dırektory Naır Bıdjý prezıdentke kásiporyndy odan ary damytý perspektıvasy, jańa koks batareıasy qurylysynyń jospary, ekologıalyq qaldyqtardy azaıtý jóninde qabyldanyp jatqan sharalar jaıynda málimet berdi.

Memleket basshysy sehtyń daıyn ónimderi men jumys júktemesin qarap kórdi. Myryshpen qaptalǵan tabaqshalarǵa konstrýksıalyq materıaldar óndirisi men qurylysta suranys joǵary. Metalýrgıa óndirisindegi bul ónimniń qosymsha quny qymbat.