Jambyl oblysynda múıizdi iri qara mal ósiretin jańa reprodýktor paıda boldy. «Jambyl Et MS» sharýashylyǵy sıyr eti óniminiń sanyn arttyrý maqsatynda Irlandıadan 1000 angýs tuqymdy sıyrlaryn satyp aldy. Kelgen iri qara maldyń kóbisi reprodýktor mártebesin rastaıtyn qajetti asyl tuqymdyq kýálikterin aldy.

Investısıalyq joba «Agrarlyq nesıe korporasıasy» AQ «QazAgro» UBH» AQ-nyń qarjylandyrýynyń arqasynda júzege asyryldy.

«Aberdın-angýs asyl tuqymy et óndirisi boıynsha eń úzdikterdiń biri bolyp sanalady» dep habarlaıdy sharýashylyq dırektorynyń orynbasary Bahyt Iskalıev.

Qazir sharýalar mal baǵýǵa kirisip ketti. Jańa sharýashylyq qaraýsyz bos qalǵan bazada quryldy.

Sharýashylyqtar, ákimshilik ǵımarat jáne jazǵy malǵa arnalǵan oryndar qalpyna keltirildi. Múıizdi iri qara sharýashylyǵynan bólek, seriktestik aýylsharýashylyq tehnıkalary men qajetti qural-jabdyqtar satyp aldy.

Jobanyń jalpy quny 1,5 mıllıard teńgeni quraıdy, onyń 1,1 mıllıardyn Agrarlyq nesıe korporasıasy bólgen. Nesıe jyldyq 6% -ben 10 jylǵa berildi.

Jambyl oblysy boıynsha ANK fılıalynyń dırektory Nurǵalı Seıitbekov korporasıanyń basty maqsaty – qazaqstandyq fermerlerge qol jetimdi nesıe berý ekenin atap ótti.

Onyń aıtýynsha, ónerkásipti qarjylandyrý mýltıplıkatıvti áserge ıe: aýylda jańa kásiporyndar men jumys oryndary ashylýda.

Sońǵy bes jylda Agrarlyq nesıe korporasıasy qarjylandyrýynyń arqasynda elde 10000-ǵa jýyq jańa jumys oryndary quryldy. Tek 2019 jyldyń ózinde 10,5 mıllıard teńgege 442 joba etti mal sharýashylyǵyn damytýǵa qarajat aldy. Osy jyly Agrarlyq nesıe korporasıasy búkil Qazaqstan boıynsha jeti asyl tuqymdylar sharýashylyǵymen aınalysatyn fermalardyń qurylýyn qarjylandyrdy. Nátıjesinde elde múıizdi iri qara sany men et ónimderiniń sapasy artty.

Bolashaqta «Jambyl Et MS» sharýa qojalyǵy mal basyn 6-7 myń bas iri qaraǵa jetkizýdi josparlap otyr. Qazir qojalyqta 35 adam jumys isteıdi, ortasha jalaqy – 130 myń teńgeni quraıdy. Eger keńeıtý josparlary shyndyqqa aınalatyn bolsa, onda jumysshylar sany da ósedi.