Qazaqstanda jylyna shamamen 2 mln tonna sút tapshy. Ony joıý úshin sútti-taýarly fermalardyń jańa jobalaryn iske asyrý qajet, al fermerler muny memlekettik damý ınstıtýttarynyń nesıelik qoldaýynsyz jáne memlekettik sýbsıdıasyz jasaı almaıdy. Mundaı pikirdi Qazaqstan fermerleri qaýymdastyǵy basqarma tóraǵasynyń orynbasary Ermek Ábýov bildirdi, dep habarlaıdy «QazAqparat».
Fermerler qaýymdastyǵy basshysynyń orynbasarynyń aıtýy boıynsha, elde jylyna shamamen 6 mln tonna óndiriletin sútke qaramastan sút jetispeýshiligi saqtalyp otyr.
«Aýyl sharýashylyǵy mınıstrliginiń málimetteri boıynsha, jyl saıyn 25 iri sút fermalaryn salý josparlanǵan. Bul óndiris kólemin jylyna 150 myń tonnaǵa deıin arttyrady. Biraq sút jetispeýshiligi kólemi ósýde: sebebi halyq sany kóbeıgen saıyn, suranys ta birge ósýde», – dedi Ábýov.
Tapshylyqty jeńý úshin, ol sútti-taýarly fermalar salý arqyly sút óndirisin ulǵaıtý kerek deıdi. Biraq muny memlekettik qoldaýsyz júzege asyrý qıynǵa soǵady.
«Sút fermalarynda kóp shyǵyndy qajet etetin úzdiksiz jumys sıkli júredi. Qazirgi sútti-taýarly fermalar kem degende 400 iri qara maldan bastap salynýda. Investorsyz, «QazAgro» tobynyń memlekettik damý ınstıtýttarynyń kómeginsiz bıznes qurý múmkin emes. Jobalar mıllıardtaǵan qarjyny talap etedi – mundaı aqsha kimde bar?» – deıdi spıker.
Ranking.kz málimetteri boıynsha, aýylsharýashylyq ındýstrıasyna salynǵan ınvestısıalar sońǵy 5 jylda jylyna orta eseppen 26,8% ósken. Bul oraıda «QazAgro» Ulttyq basqarýshy holdıńi AQ enshiles uıymy «Agrarlyq nesıelik korporasıasy» AQ mańyzdy ról atqarady. Tek 2020 jyly «Agrarlyq nesıelik korporasıa» jalpy quny 41,6 mıllıard teńge turatyn 48 ınvestısıalyq jobany qarjylandyrdy. Onyń 15-i quny 12,7 mıllıard teńgeden astam qarjy sútti-taýarly fermalaryna arnalǵan.
Ermek Ábýov bul jobalardyń quıylǵan qarjyny aqtaý merzimi uzaq, shamamen 7 jyldan bastalatyndyǵyn atap ótti. Sondyqtan, fermerlerge jyl saıynǵy tólem aýyrtpalyqqa aınalmas úshin tómen paıyzdyq mólshermen nesıe alý kerek. Agrarlyq nesıelik korporasıanda keıbir baǵdarlamalar boıynsha qaryz mólsherlemesi jylyna 1,5%-dan bastalady.
İri qara mal ósirýmen aınalysatyn sharýa qojalyqtaryn qarjylaı qoldaý nátıjesi – ishki naryqty eksporttaýǵa alyp keledi.
Sútti-taýarly fermalar qurylysy aýyldaǵy ómirdi jaqsartýǵa kómektesedi. Abýovtyń aıtýynsha, sútti fermalar aýyl turǵyndaryn jyl boıyna jumyspen qamtamasyz ete alady. İri qara maldy saýyp, tamaqtandyryp, kún saıyn baptaý úshin aýyl adamdary jylyna 365 kún boıy jumys isteıdi.
Pikir qaldyrý