Prezıdent joǵarǵy sot tóraǵasy Jaqyp Asanovty qabyldady. Bul týraly akorda.kz saıty habarlady.

Memleket basshysyna aldaǵy sot reformasynyń negizgi baǵyttary, ákimshilik ádilet mehanızmin engizýge daıyndyq jumystary, sondaı-aq, sot óndirisinde qoldanylatyn İT ázirlemeler jaıynda baıandaldy.

Jaqyp Asanov sot júıesin 2021 jyldyń shilde aıynan bastap kúshine enetin jańa ákimshilik rásimdik-prosestik kodeksine daıyndaý barysy týraly aıtty.

Qasym-Jomart Toqaev árbir sot zań ústemdigin qamtamasyz etýdegi óziniń rólin tereń túsinýi kerek ekenine basa mán berdi. Memleket basshysynyń pikirinshe, bul azamattardyń quqyǵy men erkindigin qorǵaý, qolaıly ınvestısıalyq klımat qalyptastyrý, kásipkerlikti jáne tutas ekonomıkany damytý boıynsha mańyzdy mindet.

Qazaqstan prezıdenti sottardyń kásibıligi men adaldyǵy eń basty qundylyq bolýy kerek ekenin atap ótti. Sebebi aldaǵy ýaqytta iske asatyn reformanyń tabysty bolýy osyǵan tikeleı baılanysty.