Bilim jáne ǵylym mınıstri Asqat Aımaǵambetov facebook paraqshasynda pedagogter men ǵylymı qyzmetkerlerge marapattar taǵaıyndaýdyń jańa talaptaryn jazdy.
– Jumysta mindetin óte jaqsy oryndaǵan kez kelgen maman tıisti túrde yntalandyrylýy kerek. Bul qyzmettegi ósý ǵana emes, belgili bir jetistikter úshin beriletin aqshalaı syıaqylar nemese gramotalar men tósbelgiler bolýy múmkin. Tipti jumystyń sapaly oryndalǵany úshin basshylyq tarapynan aıtylatyn alǵystyń ózi úlken motıvasıa beredi. Osy rette kótermeleý júıesiniń mańyzy zor ekeni belgili.
Biz marapattardy taǵaıyndaý úderisiniń barynsha obektıvti, ashyq jáne merıtokratıa qaǵıdattaryna tolyǵymen sáıkes bolýyna umtylamyz. Osy maqsatta bilim jáne ǵylym mınıstrliginiń vedimistik nagradalary men marapattaý júıesine qatysty jańa ózgeristerdi engizýge negiz bolatyn buıryq daıyndadyq. Bul mınıstrlik tarapynan usynylatyn dıplomdarǵa, gramotalarǵa, tósbelgiler men alǵys hattarǵa qatysty másele. Áriptesterimniń arasynda atalǵan marapattardy berýdiń obektıvtiligine qatysty birneshe ret suraqtar týyndaǵanyn jasyrmaımyn. Osyǵan baılanysty barlyq kúmándi joıý úshin biz pedagogter, oqý isiniń meńgerýshileri, mektep dırektorlary, ádiskerlerden turatyn jumys tobyn qurdyq. Buıryqqa engizilgen usynystardy da dál osy jumys toby ázirledi. Bul qujattyń buǵan deıin qoldanysta bolǵan buıryqtan aıyrmashylyǵy aıtarlyqtaı kóp, – dep jazdy mınıstr.
Marapattardy berýge qatysty qoıylǵan jańa talaptar bar.
"Qoıylǵan jańa talaptardyń birnesheýin atap óteıin:
– jumys kórsetkishteriniń naqty tizbesi kórsetiledi;
– kórsetkishter mańyzdylyǵyna qaraı ártúrli balmen baǵalanady, básekelestik bolýy úshin marapat kóp bal jınaǵan adamǵa beriledi;
– kótermeleýdiń jańa túrleri engiziledi (deńgeı boıynsha bilim berý isiniń úzdigi qurmet gramotasy);
– marapattaý rettilikpen beriledi (birden eń joǵary marapat berilmeıdi, rettilik saqtalýy tıis);
– marapat alatyn tulǵalar boıynsha aqparat sıfrlandyrylýy, esepke alynýy jáne ashyqtyq qamtamasyz etilýi tıis.
Atalǵan buıryqqa sáıkes marapattardy taǵaıyndaý tártibi naqty retke keltirilgen. Munyń barlyǵy marapatqa úmitkerlerdi ádil jáne ashyq irikteýge, sýbektıvti táýekelderdi aıtarlyqtaı azaıtýǵa baǵyttalǵan. Jańa talaptar elimizdegi pedagogter men ǵalymdardy obektıvti ári ashyq marapattaý tártibin qamtamasyz etýge múmkindik beredi dep sanaımyz. Úmitkerlerdiń jumys ereksheligin eskere otyryp, olardyń qandaı da bir marapatqa ıe bolý múmkindigin teńestirý úshin biz mektepke deıingi, bastaýysh, orta, orta bilimnen keıingi bilim berý, TjKB pedagogterin, JOO oqytýshylary men ǵylymı qyzmetkerlerdi saralaý boıynsha sheshim qabyldadyq. Osylaısha, muǵalimderdiń nemese ǵalymdardyń ár jeke sanatynda básekelestik bolady. Jyl saıyn bizdiń bastamamyz boıynsha pedagogter men ǵylymı qyzmetkerlerdiń normalanǵan sany marapattalatyn bolady. Bul rette basshylyq mindetterin atqaratyn azamattar sany (dırektorlar, meńgerýshiler jáne t.b.) 20 paıyzdan aspaýy tıis" delingen mınıstrdiń áleýmettik jelidegi jazbasynda.
Pikir qaldyrý