Elbasy Nursultan Nazarbaev "Nur Otan" partıasynyń respýblıkalyq saılaýaldy shtabyna bardy. Bul týraly elbasy.kz saıty habarlady. 

Saǵat 00:00-de exit poll nátıjeleri baıandalǵan jańalyqtar shyǵarylymy qaraldy. Exit poll qorytyndysyna sáıkes "Nur Otan" partıasy saılaýshylardyń 71,97 paıyz daýysyn jınaǵan.

– Barshańyzdy "Nur Otan" partıasynyń aıqyn jeńisimen quttyqtaımyn. Ekzıt poldyń aldyn ala nátıjeleri qazaqstandyqtar elimizdiń ári qaraı damýyn bizdiń partıamyzben baılanystyratynyn kórsetti. Saılaýdyń el táýelsizdiginiń otyz jyldyǵymen tuspa-tus kelýiniń sımvoldyq máni bar. Osy ýaqytta orasan zor jumys atqaryldy. Eń bastysy ­– jańa aýqymdy maqsattarǵa qol jetkizý úshin berik negiz qalandy.

Álemde koronavırýs indetine shaldyqqandar sany artýda. Dúnıejúzilik bank álemdik ekonomıkanyń quldyraýy men jumyssyzdyq ósedi dep boljap otyr. Bul jaǵdaıda birtutas saıası kúshtiń aınalasyna toptasqan qoǵam ǵana jeńiske jetedi, ­– dedi Elbasy.

Nursultan Nazarbaev búgingi jetistik jumyla atqarylǵan jumys pen partıanyń árbir múshesiniń eseli eńbeginiń nátıjesi ekenin atap ótti.

– Barshańyzǵa atqarylǵan jumys úshin rızashylyǵymdy bildiremin jáne tek jaqsylyq tileımin. Naýqan tıimdi ári nátıjeli ótti. Partıa qatary jańardy. Halyq arasynda bedeli bıik jańa kóshbasshylarymyz bar. Ár aýdannyń, qalanyń, oblystyń damýy úshin halyqtyq baǵdarlamalar ázirlendi. "Nur Otan" partıasynyń basty maqsaty – halyqtyń turmysyn jaqsartý jáne eldigimizdi nyǵaıta berý. El bolyp birige bilsek, alynbaıtyn asý joq. Basymyzǵa túsken qıyndyqtardy biz árdaıym birge eńserip, jetistikterge birlese jetemiz. Barshańyzdy partıamyzdyń búgingi jeńisimen quttyqtaımyn, – dedi partıa tóraǵasy.

Elbasy "Nur Otan" partıasynyń saılaýaldy baǵdarlamasy bes ınstıtýsıonaldyq reformanyń, sonyń ishinde memleket basshysynyń halyqqa joldaýynda bergen tapsyrmalarynyń jalǵasy ekenin aıtty.