Qazaqstandyqtar zeınetaqy jınaqtarynyń bir bóligin kelesi aptadan bastap ınvestısıalaýshy kompanıaǵa bere alady. Bul týraly qarjy naryǵyn retteý jáne damytý agenttigi baǵaly qaǵazdar naryǵy departamentiniń dırektory Edil Medeý málimdedi.

Qazirgi tańda zeınetaqy aktıvterin basqarýǵa qatysty jumystar júrgizilip jatqanyn aıtty. Kelesi aptadan bastap qyzmet qoljetimdi bolady.

"Zeınetaqy aktıvterin basqarýdy josparlap otyrǵan jekelegen basqarýshy kompanıalar BJZQ-men zeınetaqy aktıvterin senimgerlik basqarý sharttaryn jasasý jumysyn bastap ketti. Aqpannyń basynan olar aqparat almasýǵa jáne zeınetaqy jınaqtaryn berýge baılanysty tehnıkalyq máselelerdi pysyqtap jatyr. Shart jasasyp, BJZQ saıtynda basqarýshy kompanıalardyń tizilimi jarıalanǵannan keıin salymshy kompanıany tańdap, óz jınaqtarynyń bir bóligin sol jerge aýdara alady. Kelesi aptada bul opsıa salymshylarǵa qoljetimdi bolady dep oılaımyz", - dedi Edil Medeý agenttiktiń brıfıńinde.

Qazaqstanda 18 basqarýshy kompanıanyń altaýy zeınetaqy aktıvterin basqarý quqyǵyn paıdalana alatynyn naqtylandy. Bul týraly agenttik tóraǵasynyń orynbasary Marıa Hadjıeva aıtyp berdi. 

"Bul bıznesti júrgizýge arnalaǵan sheshim, sondyqtan basqarýshy kompanıa men onyń aksıonerleri bul sheshimdi ózderi qabyldaýy kerek. Sol sebepti alty kompanıanyń bári bul qyzmet naryǵyna shyqpaýy da múmkin. Basqarýshy kompanıalardy qosý, olardyń bul qyzmetti mindetti túrde kórsetetinin bildirmeıdi", - dep túsindirdi Hadjıeva.

Zeınetaqy jınaqtaryn kompanıalar basqarýyna berý úshin ony BJZQ-men birge júrgizetin qosymsha shart jasasý qajet.

Buǵan deıin agenttik jınaqtardy merziminen buryn alý sheńberinde qazaqstandyqtardyń zeınetaqy aktıvterin basqarýǵa ruqsat bere alatyn alty kompanıany atady:

- First Heartland Jysan Invest AQ;

- BCC Invest AQ - "Bank SentrKredıt" AQ-nyń enshiles uıymy;

- Halyk Global Markets AQ ("Qazaqstan Halyq banki" AQ EU)");

- Halyk Finance "Qazaqstan Halyq banki" EU AQ;

- First Heartland Capital AQ;

- "Sentras Sekúrıtız" AQ.