Pandemıasy saldarynan ekonomıkanyń eń kóp zardap shekken sektorlarynyń biri shaǵyn jáne orta bıznes júktemeni azaıtý, qarjylandyrýǵa, suranys naryqtaryna jáne sapaly adam resýrstaryna qoljetimdilikti keńeıtý boıynsha memlekettik qoldaýǵa ıe bolady. Bul týraly prezıdent janyndaǵy Ekonomıkalyq ósimdi qalpyna keltirý jónindegi memlekettik komısıanyń otyrysynda belgili boldy.

Kásipkerlerdi qoldaý boıynsha maquldanǵan shuǵyl sharalar toptamasyna saı, 2021 jylǵy 1 maýsymǵa deıin jeńildikti sharttarmen qaıta qarjylandyrý úshin shaǵyn jiáne orta bıznes tizbesin 29-dan 174-ke deıin keńeıtý kózdelip otyr.

Sondaı-aq memlekettik múlik obektileri men kvazımemlekettik sektor múlkin jaldap otyrǵan kásipkerlerdi 31 shildege deıin tólemderden, jyl sońyna deıin múlik salyǵyn tóleýden bosatý, jumys berýshiden alǵan qorǵaý qarajaty túrinde kásipkerlik sýbektileri jumyskerleriniń tabystaryn jeke tabys salyǵynan bosatý qarastyrylǵan.

Memlekettik organdar men kvazımemlekettik sektor sýbektileriniń bastamasy boıynsha zańdy tulǵalar men jeke kásipkerlerdiń bankrottyǵyna moratorııdi 2021 jylǵy 1 shildege deıin uzartý, otandyq taýar óndirýshilerdiń memlekettik satyp alýǵa qoljetimdiligin arttyrýdy, "Damý" KDQ" AQ kepildik berý quralyn Ulttyq banktiń jeńildikpen nesıelendirý baǵdarlamasyna taratý josparlanǵan.

Úkimettiń esebinshe, tikeleı is-qımyl sharalary JİÓ-niń 3%-ǵa ósýine qol jetkizýge yqpal etetin bolady. 3,3 mln-nan asa adam jumys isteıtin 1,2 mln-nan astam kásipkerlik sýbektilerin qoldaý qamtamasyz etiledi.

Premer-mınıstr parlament májilisine 25 naýryzǵa deıin usyný úshin Ulttyq ekonomıka mınıstrligine qoldanystaǵy zańnamaǵa tıisti túzetýler toptamasyn 12 naýryz deıin úkimetke tapsyrýdy júktedi.