Baqytjan Saǵyntaevtyń tapsyrmasy boıynsha Almaty qalasy ákiminiń orynbasary Erjan Babaqumarov megapolıstegi epıdemıologıalyq ahýaldyń nasharlaýy saldarynan koronavırýs ınfeksıasynyń taralýynyń aldyn alý jónindegi Qalalyq shtabtyń jumys keńesin ótkizdi.

Keńeske qalalyq Qoǵamdyq densaýlyq basqarmasynyń basshysy N. Tabynbaev, aýmaqtyq Sanıtarlyq-epıdemıologıalyq baqylaý departamentiniń basshysy, megapolıstiń memlekettik bas sanıtarlyq dárigeri J. Bekshın, aýdandyq ákimdikter men beıindi basqarmalardyń ókilderi qatysty.    

Basty maqsat – ınfeksıanyń taralýyna qarsy kúrestiń qosymsha sharalaryn qabyldaý jáne mýtasıalanǵan COVID-19 shtammynyń aınalymyn eskere otyryp, medısınalyq qyzmetke muqtaj pasıentter sanynyń artýyna oraı densaýlyq saqtaý júıesi ınfraqurylymynyń daıyndyǵyn qamtamasyz etý.  

Búginde Almatyda 86 myńnan astam KVI juqtyrǵan jaǵdaı tirkelgen, onyń ishinde sońǵy táýlikte tirkelgender sany - 993 jaǵdaı. Sonymen birge, táýlik saıyn 400-den astam naýqas aýrýhanaǵa jatqyzylýda, bul emdelip shyqqandar sanynan 2 ese kóp. COVID-19-pen 3099 pasıent stasıonarlyq emdelýde jatvr, al reanımasıa men ıntensıvti terapıada 228 naýqas jatyr.  

Ákimniń orynbasary Erjan Babaqumarov shilde aıynyń basynan beri reanımasıa bóliminde jatqan naýqastar sanynyń úsh esege artqanyn, úı karantınindegi pasıentterdiń dınamıkasy (5821 naýqas) ótken aıda 6 esege óskenin atap ótti. Barlyq ınfeksıalyq stasıonarlarda tósek oryndardyń júktemesi 50%-dan asady. Sondyqtan tamyz-qyrkúıek aılaryna arnalǵan boljamdy jaǵdaılardy jáne qaladaǵy aýrýlardyń qarqyny men deńgeıin eskere otyryp, qalada rezervtik ınfeksıalyq tósekterge qajettilikti anyqtaý tapsyryldy (qoldanysta 6 090 tósek-oryn bar) jáne olardy paıdalanýdy bastaý qajet.  

Sonymen birge, kadr rezervin qamtamasyz etý jáne olardy kovıdti terapıaǵa úıretý, vaksınasıa tólqujattarynyń qoldan jasalýymen kúresý jáne aldyn-alý boıynsha nusqaýlar berildi.

  Koronavırýs ınfeksıasynyń taralýynyń aldyn alý jónindegi Qalalyq shtab almatylyqtardy qorǵanys sharalaryn – betperde rejımin, áleýmettik qashyqtyqty qatań saqtaýǵa, adamdar kóp jınalatyn oryndarǵa barmaýǵa, sonymen qatar vaksınalaný máselesin keıinge qaldyrmaýǵa shaqyrady, óıtkeni bul ınfeksıadan qorǵaýdyń jalǵyz ádisi.