Almaty qalasynyń ákimi Baqytjan Saǵyntaev jumys sapary kezinde balabaqshalardyń, mektepterdiń, sýmen jabdyqtaý jelileriniń, joldardyń qurylysymen jáne aýmaqty abattandyrýmen tanysty.

Aýdanda mektep oryndarynyń sanyn kóbeıtý maqsatynda 5 jańa mektep jáne burynnan bar mektepter janynan eki korpýs salý josparlanýda. Qala ákimi 125 oryndy №166 lıseıdiń jańa korpýsyn kórdi. Kitaphana, asqana jáne sport zaly bar jańa ǵımarattyń arqasynda oqytý jaǵdaıy jaqsardy. Sondaı-aq, ashyq sport alańy salyndy.

Jalpy, Alataý aýdanynda «Búdjetke qatysý» jobasy boıynsha 24 oıyn jáne sport aımaǵy qurylady. Buryn qaraýsyz qalǵan aımaqtardaǵy jergilikti qoǵamdyq keńistikter abattandyrylatyn bolady.

Daraboz shaǵyn aýdanynda 320 orynǵa eseptelgen jańa jeke balabaqsha Zere School ashyldy. Bilim berý baǵdarlamasymen jáne ishki qurylymymen tanysqannan keıin qala ákimi Bilim basqarmasynyń basshysyna az qamtylǵan otbasylardyń balalaryna tólenetin ótemaqy máselesin pysyqtaýdy tapsyrdy.

B. Saǵyntaev sonymen qatar bolashaq ulttyq juqpaly aýrýlar ǵylymı ortalyǵynyń qurylys alańynda boldy. Jańa medısınalyq mekeme Elbasynyń tapsyrmasy boıynsha salynýda ári 350 tósek orynǵa eseptelgen. Qazirgi kezde jer ústi daıyndyq jumystary júrýde. İrgetasyn salý úshin shamamen 110 myń tekshe metr topyraq shyǵaryldy.

Aýdandaǵy sporttyq ınfraqurylymdy jaqsartý úshin úshin deneshynyqtyrý saýyqtyrý kesheni jáne tórt jabyq jáne on ashyq korty bar tenıs ortalyǵy salynýda. B. Saǵyntaev nysandardy paıdalanýǵa berý qarqynyn jedeldetýdi tapsyrdy.

Qala ákimi jeke ınvestor salyp jatqan ústel tenısi ortalyǵyn qarap shyqty. 12 ústelge arnalǵan oıyn zalynyń alańy 1510 sharshy metrdi quraıdy. Sportshylarǵa arnalǵan qonaq úı men asqana, kórermenderge arnalǵan trıbýna bar.

Zerdeli shaǵyn aýdanynda B. Saǵyntaev úılerdiń irgetasyn nyǵaıtý jumystarynyń barysyn tekserdi. Búgingi tańda «QazQSǴZI» AQ júrgizgen zerdeleýler men usynystarǵa sáıkes úsh úı nyǵaıtylyp, tegisteldi. Bıyl 10 úıdiń irgetasyn nyǵaıtý josparlanǵan. Bekitilgen úılerdiń qasbetterin syrlaý jáne kireberisterin jóndeý jumystary jalǵasýda.

Sonymen qatar, aýlalardy abattandyrý, aryq jelilerin jóndeý josparlanǵan. Qurylys-montaj jumystary jumys kestesine sáıkes júrgizilýde. Qala ákimi qurylys jumystarynyń sapasyna jáne barysyna kúndelikti baqylaý jasaýdy tapsyrdy.

Megapolıs ákimi Nurkent shaǵynaýdanyndaǵy 18 úıdiń qasbetterin jóndeý barysymen tanysty. B. Saǵyntaev Qala qurylysyn baqylaý basqarmasynyń mamandaryn tartýdy jáne shaǵyn aýdannyń belsendi turǵyndarymen birge júrgizilip jatqan jumystardyń sapasyna qatań baqylaý ornatýdy tapsyrdy. Aýla aýmaqtaryn abattandyrýda jáne turǵyn kesheninen shyǵatyn qosymsha oryndy uıymdastyrýda turǵyndar pikirleri eskerilýi tıis.

Alǵabas shaǵyn aýdanynda qala ákimine ınjenerlik jeliler qurylysynyń qarqyny týraly baıandaldy. Jobanyń birinshi kezeńi aıasynda ótken jyly 14,5 shaqyrym sýmen jabdyqtaý jáne 11 shaqyrym sý burý jelileri salyndy. Osy jyly 2,5 shaqyrym sýmen jabdyqtaý jáne 2,5 shaqyrym káriz jelilerin salý josparlanýda. Sýmen jabdyqtaýdyń abonenttik jelileri qosylýda, sondaı-aq jol jamylǵysynyń negizderi jasalýda. Sýmen jabdyqtaý jáne sýdan burý qyzmetin 6 myń turǵyn (1250 úı) paıdalanatyn bolady.

Ekinshi kezeń aıasynda Alǵabas shaǵyn aýdanynda 10 km sý qubyrlary men káriz jelileri tartý josparlanǵan. Aıaqtaý kelesi jylǵa josparlanǵan. Sý jelilerine 4,5 myń adam turatyn 1014 úı qosylady.

Sondaı-aq, Almaty ákimi B. Saǵyntaev Alǵabas shaǵyn aýdanynyń Aldıar kóshesindegi sý basqan zardaptardy joıý jumystarynyń sapasyna baǵa berdi jáne Áıgerim 1,2 shaǵyn aýdandaryndaǵy jumys barysymen tanysty. Munda 15 shaqyrym sý jelileri men 15 shaqyrym sý burý jumystary júrgizilýde. Jumysty keler jyly aıaqtaý josparlanýda.

Nurkent shaǵyn aýdanynda qoǵamdyq qaýipsizdikti qamtamasyz etý maqsatynda aýdandyq basqarma janynan polısıanyń jańa bólimi ashyldy. Qala ákimine munda 90 qyzmetkerdiń jumys isteıtini, qyzmet kórsetý aýmaǵy 2 myń gektar, turǵyndarynyń sany 97 myń adam ekeni baıandaldy. B. Saǵyntaevtyń tapsyrmasy boıynsha alańy 400 sharshy metr bolatyn oryn bólindi.

Jumys sapary kezinde qala ákimi «Búdjetke qatysý» aıasynda qoǵamdyq oryndardy abattandyrý jobalarymen de tanysty. Sonymen, Raıymbek dańǵyly - Momyshuly kóshesinde oıyn jáne sport alańdaryn qurýmen kópirasty keńistik rekonstrýksıalanýda. Áıgerim shaǵyn aýdanynda jergilikti qoǵamdyq aımaq kóriktendirilip, Móńke bı men Álmerek kósheleriniń qıylysynda artezıan bulaǵynyń aınalasy tazartylýda.