Jańaózen qalasynyń Rahat aýylynda 9,9 shaqyrym jol paıdalanýǵa berildi. Bul týraly qoǵamdyq komýnıkasıa ortalyǵynda ótken  brıfıńide Jańaózen qalasynyń ákimi Maqsat Ibaǵarov málimdedi. Onyń aıtýynsha, jańa jol «Aqsý» jáne «Juldyz» shaǵyn aýdandarynda tóseldi. Barlyǵy 9,9 shaqyrymdy quraıdy. Joba quny 300,658 mln. teńge.

-«Joba «Aýyldyń gúldenýi – Qazaqstannyń gúldenýi» Respýblıkalyq aksıasy aıasynda júzege asyp jatyr. Bul joldyń qurylysyn 2020 jyly «Altyn quryq» JSHS bastaǵan. Endi qurylys aıaqtalyp, jańa jol paıdalanýǵa berildi. Jańaózen qalasynda jergilikti jáne aýdandyq mańyzy bar avtokólik jolynyń jalpy uzyndyǵy 493 shaqyrym. Onyń 239 shaqyrymyna asfált tóselgen», - dedi ákim.

Al, Rahat jáne Teńge aýyldarynda gaz, sý, elektr jelileriniń qurylysy júrgizilip jatyr. Qazir atalǵan aýyldarda aıaqtalmaǵan jer telimderine ınjenerlik jeli salynýda. Bul jumyspen «Nurly Jol Qurylys» merdiger mekemesi aınalysady.

-«Búginde sýmen qamtý jelisi qurylysynyń 90 paıyzy aıaqtalyp, 9 shaqyrymǵa jýyq sý qubyry ótkizildi. Qurylys qazan aıynyń sońynda aıaqtalady. Elektrmen qamtýmen «Aıkom LTD» JSHS aınalysady. Qazir merdiger mekeme qurylys - montajdaý jumystaryna kiristi. Joba jyl sońyna deıin tapsyrylýy tıis», - dedi Maqsat Ibaǵarov. Gazben qamtý qurylysyn «Sheber Qurylys» mekemesi júrgizedi. Bul jumystyń 45 paıyzy bitken. Jobany tapsyrý jyl sońyna deıin josparlanǵan.

El Táýelsizdiginiń 30 jyldyǵy aıasynda Rahat aýylynda dárigerlik ambýlatorıa paıdalanýǵa beriledi. Ambýlatorıa aýysymyna 50 kelýshini qabyldaıdy. Jobanyń smetalyq quny - 454,6 mln. teńge. Kelisim shart somasy - 404,3 mln. teńge. Aıta keteıik, qazir Jańaózen qalasy boıynsha barlyǵy 3 dárigerlik ambýlatorıa jumys isteıdi. Onyń bireýi jýyrda Qyzylsaı aýylynda ashylsa, taǵy ekeýi Teńge aýylynda ornalasqan.