El Táýelsizdiginiń 30 jyldyǵy qarsańynda Jańaózen qalasynda kıokýshınkaı karate-dodan İİ respýblıkalyq ashyq týrnır ótti. Jarys balalar men jasóspirimder arasynda uıymdastyrylǵan. Bul týraly Jańaózen qalasy ákimdiginiń baspasóz qyzmeti habarlady.

Týrnırge Nur-Sultan qalasynan jáne Mańǵystaý, Túrkistan, Atyraý, Almaty, Qyzylorda, Jambyl, Shyǵys Qazaqstan oblystarynan kelgen komandalar qatysty. Nátıjesinde İ oryndy Mańǵystaý oblysy ıelense, İİ oryn Atyraý oblysyna, İİİ oryn Shyǵys Qazaqstan oblysyna berildi. Qyzylsaı aýylynyń № 3 balalar men jasóspirimder sport mektebiniń sportshysy Amanqan Qydyrjan «Eń úzdik sportshy» atandy. Al, № 1 balalar men jasóspirimder sport mektebiniń sportshysy Nurqoja Qulataev «Eń úzdik tehnıka» marapatyna, Atyraý qalasynyń kıokýshınkaı karate-dodan jattyqtyrýshysy Aslan Dúısenbaı «Eń úzdik tóreshi» ataǵyna ıe boldy.

-«Týrnırdiń basty maqsaty - jas urpaqqa salaýatty ómir saltyn nasıhatttap, kıokýshınkaı karate-dony damytý. Mundaı dodalar jastardyń sporttyq sheberligin shyńdaýda úlken áser etip, elimizdegi myqty sportshylardy anyqtaýǵa kómektesedi», - dedi Jańaózen qalalyq kıokýshınkaı karate-do federasıasynyń dırektory Aldabergen Dúısekenov.

Aıta keteıik, qarasha aıynda Polsha Respýblıkasy Krakov qalasynda kıokýshınkaı karate-dodan álem chempıonaty ótedi. Onda Jańaózen qalasy № 1 jáne Qyzylsaı aýyly № 3 balalar men jasóspirimder sport mektebiniń sportshylary baq synaıtyn bolady.