Aqtaýdaǵy bilim ordalarynda «Ulttyq rýh, ulttyq sana» jańa jobasy bastaý aldy. Ulttyq qundylyqtarymyzdy nasıhattaýdy maqsat etken joba aıasynda qaladaǵy birneshe mekteptiń tórinde qazaqtyń kıiz úıleri tigilip jatyr. Bul týraly qoǵamdyq komýnıkasıa ortalyǵynda ótken brıfıńide Aqtaý qalasynyń ákimi Nurdáýlet Qılybaı málim etti. 

Qala ákiminiń aıtýynsha, №21 orta mektepte ornalasqan kıiz úıde oqýshy qyzdar úshin túrli qolóner buıymyn, al uldar úshin kıiz úıdi jyǵyp, qaıta tigýdi úıretetin arnaıy oqý kýrstary bastalyp ketken.  

-«Basty maqsatymyz ultymyzdyń qundylyǵy, asyl muramyzdy keıingi urpaqqa jetkizý. Qazirgi tańda kıeli shańyraqty jasaıtyn sheberlerdiń sany joqqa jaqyn. Dástúrdi úzip almaý kerek degen oımen, mekteptegi oqýshylarymyzǵa osy isti úıretý úshin kishigirim maketine tapsyrys bergen bolatynbyz. Ázirge eki mektepke ornatyldy. Ekinshisi №29 orta mektepke qoıylady. Ulttyq úıler kásipkerlerdiń qoldaýymen alyndy», - dedi Nurdáýlet Qılybaı.

Aıta keteıik, jobanyń tujyrymdamasy Mańǵystaý oblysy qolónershiler asosıasıasynyń basshysy, dástúrli qolónerdi dáripteýshi  Áýes Saǵynaevamen birlesip jasaqtaldy. Atalǵan joba aıasynda naýryz aıynda qala ákiminiń júldesi úshin mektepterde  «KIİZ ÚI – FEST» sharasyn uıymdastyrý josparlanyp otyr.