El Táýelsizdiginiń 30 jyldyǵy aıasynda Jańaózen qalasynyń tarıhı-ólketaný murajaıynda «Mýzeı túni» ótti. Shara  «Mýzeı – mádenıet ortalyǵy retinde dástúrdiń keleshegi» dep ataldy. Bul týraly Jańaózen qalalyq mádenıet jáne tilderdi damytý bóliminiń basshysy Gúlaıym Azan málim etti.

Onyń aıtýynsha, mamandar kelýshilerge mýzeı ekspozısıasy boıynsha ekskýrsıalyq baǵdarlamalar men «Jańaózen qalasy: keshe jáne búgin» arhıv qorynan derekti vıdeosújetter kórsetti. Sharaǵa qala turǵyndary, mektep pen arnaýly oqý oryndarynan, memlekettik jáne óndiristik mekemelerden qyzmetkerler keldi.

-«Mýzeı - ǵylymı, mádenı-tarıhı ortalyq. Munda birneshe dáýirdiń tarıhyn, etnografıasyn, tarıhı tulǵalaryn, ónerin, halyqtyń salt-dástúrin jınaqy túrde urpaqtan urpaqqa tanytady. Osy maqsatta úsh zaldaǵy ulttyq qundylyqtar kórermenderge tanystyryldy. Mýzeı túninde qalamyzdyń halyqtyq «Dombyra sazy» fólklorlyq ansambli, «Dombyra dastan» ansambli, «Altyn darıa» ájeler ansambli, kúıshiler odaǵynyń tóraǵasy Marat Qamaratdınuly jáne basqa da talanttar óner kórsetti. Aldaǵy ýaqytta mýzeı eksponattarynyń qataryn áli de tolyqtyryp, qala turǵyndarynyń nazaryna usynýdy josparlap otyrmyz. Mýzeıdegi sharalar jalǵasyn tabady», - dedi qalalyq mádenıet jáne tilderdi damytý bóliminiń basshysy.